03年發生好多不幸事件，聽潮界八卦人「鬍鬚弟」講，原來喺03年尾，大約聖誕期間，波鞋界亦有單不幸事件發生，不過又帶點爆笑成份，實在值得「分享」。話說，早前美國關刀波鞋用荷蘭啤為題材，整咗對「燈撈舖SB」，反應唔錯，香港荷蘭啤見機不可失，就立刻食住條水，搞番幾個以潮界街童為對象嘅宣傳威吓，其中有個計劃就係搵嚟本地創作人，特別以荷蘭啤為主題，生產限量一百幾十個鐵做鞋盒，希望引來班街頭鞋童一陣騷動。點知宣傳出街後，反應未算熱烈，班鞋童只關心個荷蘭鐵鞋盒是否包括埋正印──「荷蘭關刀鞋」？亦有人捉錯用神，以為每個鞋盒裏面應有埋對關刀鞋，所以決定打批鞋盒主意。某日，中環有間街頭時裝店就被人爆竊，賊人乜都冇偷，只偷走晒批荷蘭鐵鞋盒。據「鬍鬚弟」話：「班賊原意係偷荷蘭啤『燈撈舖SB』，以為批鞋盒裏面應該有齊料，點知偷走後至知淨係得個盒。批盒行頭窄，難轉手，最後只好落在收買佬手上，變成廢料循環再用。所以你話，創作何價？」
主持人：大食Jack
八卦熱報：
