Twins昨日出席電影《千機變II之花都大戰》宣傳時，被問到有關陳冠希和陳文媛同遊泰國一事，蔡卓妍（阿Sa）竟自爆於農曆新年期間與Shine的黃又南到泰國旅遊，幸未被記者發現。
吳彥祖、陳冠希（Edison）、Twins、范冰冰、瞿穎及台灣演員陳柏霖等，昨日到屯門公眾騎術學校出席電影《千機變II之花都大戰》戰馬閱兵大典，各人騎着馬匹出場，而成龍兒子陳祖明因身在北京練武，故昨日未能出席記者會。
Edison早前被拍到與女友陳文媛同遊泰國，問到其緋聞女友之一的鍾欣桐（阿嬌）是否有甩難感覺？她反問說：「乜我唔係已經甩咗難好耐咩？唔關我事呀！」問阿嬌會否向Edison打聽旅行一事及恭喜對方？她說：「恭喜啲乜呀？況且我一向都唔八卦㗎！」
當眾人追問阿嬌時，阿Sa竟自爆與Shine成員黃又南同遊泰國，她說：「我覺得佢（指Edison）好唔好彩，我都有同又南同埋其他朋友一齊去泰國，但係都冇俾人影到。」其實早前已傳阿Sa傾慕又南，二人一起過年，難免惹人遐想。
另外，《千》片導演元奎大讚成龍兒子陳祖明說：「佢老竇咁叻，佢有五成已經好好，加上佢自己又打籃球同踩roller，所以有一定嘅底子同細胞，而且佢睇佢老竇拍戲咁多年，表現一定唔會令人失望。」
此外，對於台灣有報道將陳柏霖及陳祖明作比較，陳柏霖說：「只要大家認真工作就可以。」而瞿穎離開時則乘坐Edison父親陳澤民的座駕離去。
採訪：李珮洳
攝影：林德雄
