八方路過部長樓，見到亞瑟王李國章門口擺咗兩大盤桔，大大話話有五、六呎高，氣勢之盛，磅礡處直壓隔籬幾個局長辦公室。老友講畀八方知，原本隔籬房葉澍堃最有情趣，聖誕門口放聖誕樹，過年又整盤桔擺吓，成條走廊最醒神，但農曆年前幾日，亞瑟王有樣學樣，捧咗盤大桔放門口，size比葉澍堃門口嗰盤大一個碼，馬上搶晒鏡。桔比桔，比死人，前日葉澍堃已經靜靜雞認輸，收埋門口自己盤桔，任由亞瑟王嗰盆威到夠。
日日喺走廊行嚟行去嘅老友話，亞瑟王盤桔本來好多桔仔，但唔知係咪有人偷食，冇咗好多。新聞秘書闢謠話，原來盤桔食水好深，淋極水都唔夠，搞到未到新十五，桔仔已經禿咗八九成。
（圖）亞瑟王辦公室門口放咗兩盤大桔，係部長樓最有氣氛嘅裝飾。
傳真︰2623-9278
電郵︰