港股繼續尋底，噚日恒指最低13168，曾大跌逾260點，但在20日線（13250）水平獲得支持，尾市回升上13334，僅跌97點。今個禮拜的最高同最低位比較，恒指已下跌613點，幅度4.45%。
甫收市，即傳出有大行做中移動（941）嘅披成，炒家有理冇理，立即掟期指，掟到落13253，大低水81點收場，結果如何？原來係流料。不過，大市升到呢個水平，對有意或無意伸手集資嘅公司，都好吸引，所以，有公司趁機會集資，係好正常之事，特別係現時銀行水浸，公司集資對疏導市場的資金，更可以起到積極作用。
國企指數最低4548，跌3.4%，仍守在1月19日低位4436之上，低位已見有大盤較活躍地吸納，午後行情回升，以4639收市，跌幅收窄到1.5%。芬佬認為國企跌勢已進入第4個星期，相信調整好快會告一段落。事實上，呢一兩日已有個別國企止跌回升，之前有上海石化（338）同鎮海煉化（1128），噚日則有馬鋼（323），高收2.575元，升3%。
近期無疑係有大行看淡國企，但仍有唔少大行看好後市，特別係國企普遍已由高位大幅回落，現水平股價相對更顯得吸引。例如國企指數，佢哋仍然睇今年可見6000點，而個別重磅股，例如中石油（857）同中石化（386），目標價分別係5.5元同4.2元，而中國鋁業（2600）目標價則係6.6元，預期升幅由23%至44%不等。至於盈利急升的鋼鐵股，重鋼（1053）同馬鋼（323）的目標價仍係5.5元同3.5元，並無改變。
本月初，重鋼高見4.65元，噚日收3.85元，跌幅已17%，好有可能追隨馬鋼之後，出現反彈。鋼鐵股03年度業績表現強勁，三四月間派成績表前後，將係股價急升之時。保守估計重鋼去年盈利可達8.5億元人民幣（上半年度已賺4億元人民幣），每股盈利折算0.75港元，PE僅5倍，基金目標價5.5元，PE亦僅7.4倍，係最抵買嘅H股。重鋼今年會發A股，集資逾10億元，預期PE介乎15至20倍。
郭兆誠