歐陽震華（Bobby）同郭羨妮噚日喺長沙灣一個大牌檔為新劇《鴨寮下的金蛋》拍外景，場戲係講Bobby喺大牌檔俾成班人打一輪後，郭羨妮拖住佢家姐同Bobby生嘅私生子出現，但做私生子嘅小演員Jacky好似喺度扭計，幾乎玩謝兩個大人。佢唔單只走錯位做唔到表情狂NG，當大家等埋位拍第二場戲時，小演員重攞住條水喉亂咁搖，後來重開水喉對住郭羨妮掃射，好彩Bobby一手擋開水喉，郭羨妮先冇喺大冷天變落湯雞。
Bobby都好無奈，佢話：「Jacky平時好醒目，又靚仔又識𠱁人，有時拍嘢攰見到佢都精神晒，今日太多大人叫佢做呢樣又做嗰樣，佢唔知聽得邊個講先扭計啫。」
而郭羨妮拍一場同Bobby嗌交嘅戲時，佢就好小心咁唔俾Bobby個手踭碰到自己嘅重要部位，但Bobby就講笑話：「你唔使驚，我唔會打到你重要部位嘅。」後來Bobby又同馮仁昭講：「我點會打到佢重要部位？要掂就實掂到，但我梗係唔會特登掂啦。」
威利同李龍基噚日到新城接受訪問，佢哋喺下月七日會喺文化中心搞一個演唱會，𠵱家唔少實力派嘅歌手出番嚟唱歌，成績都唔錯，威利覺得時下嘅年輕歌手要充實自己，佢重覺得好似梅艷芳捱出嚟嘅歌手真係天下間少有，阿梅嘅成就亦係得來不易，所以佢覺得後輩應該好好學習。
鄧麗君過身成八年，一班歌迷仍未忘情，噚日係鄧麗君五十一歲生忌，佢喺赤柱嘅故居因為賣咗畀人，所以噚日係最後一次開放畀歌迷參觀，百幾人排隊入場，重有一班做《但願人長久》舞台劇嘅演員都有去上香，包括楊天經同小喬等，成班人喺拜祭時唱《月亮代表我的心》，都表現得好感觸。
黃家強前晚喺上環出席一個校園活動，佢帶同男子組合PicassoHorses表演，家強話：「希望佢哋多啲出席同類活動，吸收多啲演出經驗。我覺得佢哋幾位成員都好有潛質，希望對樂壇有貢獻。」Beyond嘅黃貫中同黃家強都積極培育啲新人，對香港樂壇嚟講自然係好事。
宣萱同馬德鐘合作嘅無綫新劇《烽火奇遇結良緣》將於下個月播映，宣萱話拍呢套劇嗰時好辛苦，佢噚日喺電話度話：「因為拍嘅時候係夏天，着住古裝又要打，都好辛苦，始終我冇武功底。」問到宣萱會唔會嘗試向打女路線發展，佢講笑咁話：「如果我後生幾年都會嘅。」馮仁昭覺得打女個感覺都幾新鮮，點解唔試吓呢？
有線電視揸弗人徐小明噚日同一班傳媒食飯聯誼，佢透露早排訪京後，發現電影有好多公會，電視就冇，於是佢同馬逢國、李國立等二十幾人一齊發起搞咗個香港電視專業人員協會，幫香港電視人做番啲嘢，爭取權益，例如爭取放寬喺內地拍劇嘅條例。徐小明會做住召集人先，等稍後開會先選會長同幹事，張衛健已經率先入會。
