約男友變一拖五夜蒲
章小蕙：咁樣同我開年下三流

章小蕙日前被雜誌拍得與新男伴夜蒲，並指她一拖五，昨日她大表不滿，指當晚其實約了男友，而狗仔隊亦有向她問及當時男伴身份，但文章與事實不符，她指摘對方採訪手法下三流，她說：「咁樣同我開年要投訴。」

章小蕙早前被雜誌拍得在中環KeeClub「一拖五」夜蒲，並形容其中一男伴為「上海馬德鐘」，昨日章小蕙在其時裝店回應說：「佢哋（指雜誌）咬住我唔放就真，真係下三流，咁樣同我開年，真係要同楊生投訴（該雜誌為楊受成投資）至得。」

辯稱公事應酬
章小蕙續說：「嗰日我的確係約咗男友，不過啲狗仔隊『吞pop』影唔到。嗰日企我旁邊嘅係一個喺上海好出名嘅化妝師，我哋約咗傾工作，而右邊嗰四個就係名副其實嘅路人甲乙丙丁，唔識嘅，咁都入埋我數。」
章小蕙接着說：「嗰晚啲狗仔隊有過嚟問我嘢，我都話咗我朋友嘅身份背景畀佢哋聽，佢哋重係要作文，我都冇辦法。話我哋以上海話交談，我根本就唔識講上海話，我哋係全英語交談至真，嗰個男士叫Johnny，係個好出名嘅化妝師，我哋識咗兩個禮拜咋！

「如果影到實認」
「嗰晚係傾公事，本雜誌話我哋三點先離開返馬己仙峽道屋企，嗰晚KeeClub一點就關門，我哋十二點前已經離開，係咪啲狗仔隊自己玩到三點呀？同埋我唔係住馬己仙峽道，我係送Johnny返佢羅便臣道屋企啫。」最後她說：「我份人好公道嘅，如果我拍拖俾人影到，我實認命嘅。」
採訪、攝影：RitaLeung