唐英年最近同煲呔一樣密密見人，講佢份處女預算案應該點寫；噚日上晝佢就見班新上任嘅區議會主席同副主席，聽吓佢哋有乜高見。
本來唐唐想趕去鄉議局嘅新春酒會，點知趕唔切過海，有人中午時候見佢同李國寶喺中信海都出現，唔知係咪約埋一齊食飯？唐唐辦公室就話佢老細食晏時有私人聚會，無可奉告。
咁你估唐唐同寶哥哥兩男闢室獨處，有乜好傾呢？有人話會唔會傾預算案點收支平衡？亦有人話可能傾點樣解決銀行水浸；最精靈嘅猜測就係話唐唐可能請寶哥哥出手，擺平同佢細佬李國章之間嘅爭拗。當然最後佢哋傾咗乜，係佢兩人內心嘅秘密。
老董之友陳啟宗噚日宣布成立嘅「香港發展論壇」，成員包括王冬勝同孔令成，呢兩名都大有機會同寶哥哥爭立法會個位坐，人哋已經埋堆，寶哥哥都應該開始熱身啦，好醒定啲咯喎，唔好再留咁多雙皮鞋喺房門口呀，起身啦。
傳真︰2623-9278
電郵︰