不但政府部門架床叠屋，連香港啲論政組織及政黨都架床叠屋。富商陳啟宗做召集人，成立咗一個「香港發展論壇」，董事會人員有鄭家純、鄭耀棠、鄭維健，旗下名人，重包括渣打王冬勝、地產商胡應湘、大學校長張信剛、紡織商楊敏德，重有馮華健、廖長城等等。
雖然朗尼．陳好謙虛，話「香港發展論壇」（以下簡稱「香發壇」），唔係議政團體、並無政治立場、不會參政、只係搭個雞棚畀有心人發表吓對香港前途嘅心聲。之不過，唔「論政」，點解叫「論壇」？香港嘅「發展」，唔係政治，又係乜嘢？冇政治立場？咁點解呢個單位有鄭耀棠，冇李卓人，有胡應湘，冇長毛，有馮華健，不過冇李柱銘同謝偉俊？
朗尼．陳話，佢個論壇成立嘅目的，係支持香港以「穩定為基礎」嘅「循序漸進」、維護憲法、支持基本法、支持特區政府顧及「長遠及各界整體利益施政」。意思即是：反對○七年普選，反對○八年立法會全直選，咁呢啲唔係政治立場，又係乜嘢呢？
因為「循序漸進」已經成為抗拒○七年普選嘅潛台詞，而顧及各界整體利益，亦即要顧及工商界利益。因為朗尼．陳哋多年來都認為，民主普選，一定會導致李卓人上台開倉派米。
若然係咁，民主國家如美國、英國、法國等，應該一早就變晒共產國家。點解冇？因為嗰啲國家嘅商人投資者，包括軍火商、石油商，一啲都唔怕普選，佢哋識得參與玩呢個遊戲。香港啲工商界如胡應湘等，點解咁怕普選，因為香港啲有錢佬，賺錢就叻，玩政治就水皮，佢哋唔識得點樣參與呢個遊戲。
亦唔怪得晒工商界，因為殖民地政府有教過佢哋炒股票，同埋輪候賽馬會會員籍，冇教過佢哋乜嘢叫政治。所以，十幾年來，有自由黨同港進聯，都聲稱代表工商界利益，但呢兩個黨，都有辱時代使命，如果唔係，阿Ronnie使乜自己做召集人咁辛苦，搵做廠出身嘅田少嚟代表埋佢呢班人咪得囉，使乜喺二十年前，出現過一個「啟聯資源中心」之後，今時今日，原地踏步，又生多一嚿「香港發展論壇」出嚟？可見香港嘅工商界，二十年來，都根本未曾進入到一個變幻日新嘅時代角色。
咁亦唔代表民主派嗰邊就有人才，但朗尼．陳已經年近花甲，事業咁成功，搵咗咁多水，都重要咁操勞，都咪話唔係香港嘅悲哀。
不過，「香發壇」自稱冇乜政治立場，又唔錯得晒。起碼裏面有個草根出身嘅工聯會阿頭鄭耀棠，又有大資本家胡應湘，又有前殖民地法律界blueblood馮華健，好似水滸傳梁山泊，除咗宋江，重有大地主盧俊義，又有大老粗黑旋風李逵，而且重叫陣歡迎陳太加盟（不過就話明冇邀請佢入會），究竟想搞邊科，又真係好令人𢱑晒頭。阿董個行政會議班子，有個民建聯嘅曾鈺成，又有自由黨個田少，已經七國咁亂，再整多兩件同時兼撈埋「香發壇」骨幹成員，真係花多眼亂。
惟有當住呢班精英係「智囊團」先。不過七年以來，香港人聽見「智囊」兩個字就怕。梁振英、劉兆佳、王于漸、曾鈺成……阿董的「智囊」一啲都唔少，香港經濟玩完，亦可以講係死喺班「智囊」手上。反智社會，反智囊就有一袋袋，何來咁多智囊？「香發壇」點樣開壇作法，就真係要睇吓朗尼．陳上完炷香，拜完天地之後，有乜嘢與眾不同嘅符弗攞到出嚟囉。
（圖〉朗尼．陳（中〉話「香港發展論壇」唔係議政團體、並無政治立場，唔「論政」，點解叫「論壇」？
傳真︰2623-9278
電郵︰