噚日係人日，人人生日，新界鄉議局新春團拜，鄉議局今年首次移師到九龍灣展貿中心舉行。據八方所知，整個團拜用咗八至十萬元，但係都未夠主席劉皇發咁大手筆。
話說團拜期間，發叔好風騷咁攞住杯奶茶，一邊接受傳媒朋友提問，一邊派利是，每位傳媒朋友都有兩封，但係個餡就封封唔同，有啲五十蚊一封，有啲就一百蚊。
而過年潛咗一陣水嘅特首董建華，噚日喺禮賓府舉行新春酒會，話香港嘅經濟經歷咗漫長寒冬，終於步入「春暖花開」嘅季節，盼望多年嘅人氣旺、財氣旺同勢頭旺景象，近日已經見到，加上中央大力支持，好事仍會陸續有來。
春暖花開？唔知係咪指猛似天花嘅禽流感呢？好事仍會陸續有來？千祈唔好係阿董因病落台、梁振英暫代就得嘞。
傳真︰2623-9278
電郵︰