如果○五年要選過一位行政長官，邊類人最有機會呢？聽講紅鬚軍師（歡迎對號入座）已經周圍放風，接觸不同可以親近嘅人物（即係唔同民主派行埋），第一條問題就係：「咁多人唔鍾意特首，咁你認為香港有邊個願做、邊個肯做吖？」語氣好似為董先生不值，實則收集意見。
紅鬚軍師以外嘅、曾受中央垂注嘅，就唔肯定究竟吹邊一邊風，一於按兵不動、默不作聲、詐儍等電話（貴人打嚟也），知道可以黃袍加身之後，先至行動。但亦有冷門人物部署，佢哋認為中央吸收了教訓，雖然唔肯讓港人普選特首，但會祝福一位經過直選洗禮、有若干選票支持嘅民選立法會議員（當然唔會係李柱銘之流及其同路人）。咦，賠率夠高噃，可以博一鋪，冷門人物躍躍欲試，想循直選入手，就正如未有受溫布頓網球賽邀請參賽嘅球員，先打場外賽，以wildcard資格參賽。
正是機關算盡，各自精采，如果黃文放仍然在生，我哋就有過癮分析文章睇咯。有啲猛人聽到風聲，好唔鍾意某人搶閘排頭位，好驚佢排得好檔位，一放絕塵，其他人後上不及，於是不惜公開不點名篤爆。實行大力掹吓馬毛，等隻馬在閘廂內起擒先；起擒衝閘嘅馬，好容易放乾咗而被獸醫着令退出競賽也！
我哋無權無勇，任上頭玩。唔抵得嘅，九月立法會選舉，非投票不可。