女藝人嫁咗個有米嘅老公，得閒寫吓書，好多人都羨慕佢，但其實佢老公好爛滾，出面有好多女朋友，最慘個男人生得幾靚仔，好多女人主動黐埋去，都唔係淨係為佢啲錢。
女藝人結婚嗰陣，個婚禮都搞得好好睇睇，其實只要係香港人，都應該知個男嘅已經有老婆。
馮仁昭真係唔明點解重有咁多女人黐埋去？唔通結咗婚嘅男人真係馨香啲嘅？
不過講番轉頭，牛唔飲水唔㩒得牛頭低，個男嘅好鍾意去蒲，馮仁昭就喺熱門蒲點見過佢，當時佢同成班朋友一齊，其中有幾個女仔同佢表現得好親熱，不時攬頭攬頸，而馮仁昭有幾個朋友都撞過男嘅同唔同嘅女仔一齊㖭！
其實嗰個女藝人同老公結咗婚都唔係好耐，不過個男嘅就滾成咁，真係好離譜，睇嚟佢同女藝人呢段婚姻都危危乎！
陳松伶早排出咗本《松松姐姐美容魔法》美容書，近日俾讀者投訴話用咗書入面教用嬰兒油除黑頭方法，反而令佢出咗暗瘡。松松噚日對此話：「我教大家用嬰兒油按摩，唔係將佢搽喺塊面過夜，應該按摩後清洗番，否則會堵塞毛孔。」松松強調所有方法都有問過美容顧問同醫生先寫出嚟。
藍潔瑛日前因精神問題入醫院，噚日有兩個圈外朋友探佢，幫佢買日常用品同小食，逗留咗個幾鐘後，藍潔瑛啲朋友就話佢精神比之前好咗好多，幾時出院就未知，其中一位話：「佢之前唔夠瞓精神唔好先亂講嘢啫，𠵱家冇嘢呀。」
蔡少芬噚日去將軍澳電視廣播城拍《陀槍師姐IV》，有病在身嘅蔡少芬話：「《陀槍》可以出街，就好似生仔一樣，佢好唔好，就留番畀觀眾決定，我梗係想收視好！」講到佢拍呢套劇要騎鐵馬，蔡少芬就即刻鬼咁精神話：「嗰時我咁啱考到牌，好多shot都係自己揸，拍得好真，我重可以揸到好遠。」
日本藝人千葉真一同女藝人白田久子噚日嚟咗香港，拍攝電影《爆烈都市》，佢哋到時會同任達華、方中信合作，下個月四號先至返日本。另外，范冰冰同一名白髮男人出現香港機場，對記者鏡頭十分迴避。
二人男子組合Shine嘅黃又南喺新年期間去咗泰國旅行，為怕感染禽流感，佢堅持食豬肉，佢噚日話：「啲伙記猛話chickengood!我就話chickenno!onlypork﹗」另外，問到徐天佑有冇去緋聞女友Miki屋企拜年，佢就面紅紅咁話冇。
港姐冠軍曹敏莉噚日去大埔出席「國際蘭花博覽會」，原來佢第一次去蘭花展，所以非常興奮，曹敏莉話：「我好少買蘭花，不過我知道會場入面有一棵蘭花值成一億咁貴。原本新年我想買桃花，但因為太忙，去嗰陣時花市已經閂咗，不過我下年一定會去買。」至於有傳郭富城想追求佢，曹敏莉就話唔相信係事實。
