英倫中部兩間球會伯明翰同維拉球迷一向水火不容，兩隊球員亦係被球迷「攻擊」對象，好似沙維治最近又俾維拉球迷騷擾，搞到要報警。
沙維治喺上季中部打吡戰時，同杜布連爭執後，成為維拉球迷公敵，雖然事隔一段日子，但球迷依然唔放過佢，查到佢個手電號碼之後，不斷傳短訊騷擾，沙維治最後要報警求助。其實，佢早前同太座莎拉出席伯明翰一個時裝展時，都有俾維拉球迷騷擾。我求大俠知道沙維治其實份人好有愛心，經常出錢幫助李斯特城一間保護動物協會，等佢哋有錢買儀器幫動物治療傷病，球員都係人，球迷唔使咁激！
唔知球迷重記唔記得邊個拉拿斯呢？之唔係嗰個留羊咩鬚嘅美國球員囉。呢個曾經踢過世界盃同奧運會嘅後衞，喺禮拜二就俾美職球會聖荷西地震委任為經理兼會長，而佢重係首個做到球會會長嘅前美職聯盟球員。佢踢到可做球會嘅話事人，邊個敢話踢波冇出息呀！
好多後生仔做事唔經大腦，搞出個大頭佛，而查爾頓嘅柏加亦唔例外，佢可能因一次錯誤而轉唔到會。呢位英格蘭新晉中場畀人影到，佢同個番士揸住條用粗口鬧熱刺同車路士嘅橫額，而係人都知佢係車路士羅致嘅目標，如果因咁嘅愚蠢行為而冇咗個機會，你話幾咁唔抵呢！
基瑾一直想係轉會市場限期前簽一名後衞，佢好有眼光睇中馬賽中堅尹貝頓，但係出手就奇低，搵已經貶落後備之蘇美爾，再加一百萬鎊，就想簽呢位「比利時史譚」。曼聯季初都曾經想搵尹貝頓，估計佢𠵱家身價都值七百七十萬鎊，基瑾真係「買米唔知價」。
熱刺雖然唔想射手簡路迪代表馬里離隊踢非洲國家盃，但最後都係留唔到人；當佢哋叠埋心水等簡路迪歸隊，又傳出可能會再於今季稍後時間，甚至下季季初繼續缺少呢位鋒將效勞；原因馬里見簡路迪咁掂，已打算搵佢幫手踢奧運外圍賽，呢勻熱刺真係多得馬里唔少囉！