屢傳婚訊令人不勝其煩嘅銀壇情侶班亞弗力（BenAffleck）同籮霸珍妮花洛庇絲（JenniferLopez），最近終於分咗手，相信最開心嘅，莫過於係幫班仔部新片《JerseyGirl》做宣傳嘅工作人員嘞！
事關最初電影公司諗住將宣傳重點放喺班仔同籮霸身上，但自從佢哋部《愛情標錯心》仆直之後，班宣傳人員當堂打窒晒，而班仔早前亦公開話宣傳主力應該放喺佢同戲中個囡囡上面。𠵱家班仔同籮霸分咗手，電影公司終於可以大條道理以班仔同個女及同莉芙泰萊（LivTyler）嘅感情做宣傳賣點。
正如班仔所講，其實以籮霸做賣點的確係有欺騙成份，皆因籮霸只係喺戲開頭客串咗十二分鐘，就因為生女而死咗。而全部戲嘅重點就係講死咗老婆嘅班仔，點樣棉乾絮濕咁獨力湊大個女。
不過一個大男人湊女就梗係會有啲論盡，而且個女愈嚟愈大，佢就愈覺得難管教，有次班仔見到囡囡個男朋友仔喺愛女前除褲，竟然即刻問個男仔會唔會娶佢個女。不過班仔都總算識到莉芙飾演嘅好女仔，令套戲可以大團圓結局。