恒基當奴（張炳強洋名）一向識飲識食，每次茶聚，都會有重點推介餸菜，佢重將食嘅文化，引入今年重頭戲西灣河碼頭項目內，特別喺會所闢咗個「美食天堂」，整咗逾千呎特大廚房。
由於個盤同煤氣公司合作，所以當奴都話，呢個係豪華版TowngasAvenue。樓盤個會所超過十萬呎，規模都唔細。
有設備齊全嘅廚房之餘，佢重邀請著名食家唯靈，出任美食顧問，提供專業意見。
噚日新春茶聚上，唯靈都有出席，重即場發揮顧問本色，為大家推介一款「大展鴻圖麵」，好意頭又應節。
咁啱噚日係初七「人日」，發展商與剛奪得銷售大獎嘅美聯，分別準備傳統壽包，同埋西式壽包形蛋糕，喺人人生日嘅日子，齊齊品嘗，應吓節。
𠵱家係業主嘅世界，買家就算畀到價，業主都隨時反價唔賣，肯用市價成交，已經算「筍價」。
但係火炭駿景園，竟然有業主以平市價七個巴仙，賣出手上單位。
蘭西聽利嘉閣分行經理石家麟講，原來個業主之前已經買入同屋苑一個千六呎大單位，所以就平買平賣。呢種情況可遇不可求，𠵱家市場已經再冇低過市價嘅放盤嘞。
唔講唔知，原來駿景園身價，每呎要四千四，比起舊年七月最低位二千九百五，足足升咗差唔多一半。叫價就高五六成。咁短時間變化之大，都算罕見。
石家麟話，駿景園以市價放盤，有十零二十個，高市價就有五六十個。
賣到近尾聲嘅青衣藍澄灣，發展商送予中原地產嘅樓盤模型，估唔到都可以幫中記造成生意。
中原地產助理區域經理麥成輝話，一個啱啱由外國返港嘅投資者，諗住入嚟佢哋青衣城分行問吓市況，見到個模型幾吸引，睇吓睇吓就扑鎚。
佢用二百六十幾萬，買咗個五座高層E單位，面積逾九百五呎，每呎近二千七，回報四五厘。
麥成輝話，呢個模型好有用，已經幫中記促成幾宗成交。
樓市暢旺，吸引唔少名人入市，好似近排頻頻有投資者出手嘅鴨脷洲深灣軒，再次有名人買樓。
前藝人司馬燕，啱啱加入業主行列，以千六萬，一口氣買入五個單位，全部都係第二座七百幾呎嘅C單位，預計用作投資。
地產代理話，佢噚日先至嚟睇樓，只不過睇咗一個鐘左右，就已經決定大手掃貨，相當豪爽。
另外，美容界名人鄭明明，日前再次出動掃貨，參觀完深灣軒示範單位之後，就用超過千三萬，買入五個六百幾呎中層B室。
噚日初七「人日」，金滙投資搞記招，準備定鮑魚款待到場人士，作為慶祝「生日」嘅禮物，又安排財神大派利是。
金滙投資元朗低密度住宅御翠園，噚日開放現樓示範單位，俾傳媒同經紀參觀。
新正頭梗係要講吓意頭，傳統切燒豬儀式，同醒獅表演，自然唔少得。
發展商為咗同大家慶祝生日，重特別喺屋苑戶外泳池邊，搞咗個自助午餐派對，品嘗鮑魚等豐富美食。
農曆新期間搞咁多嘢，都係希望今年事事順境。
蘭西
電郵地址：
