去大嶼山，唔一定要上鳳凰山睇日出，落嶼南鹿頸山對出嘅籮箕灣，綑邊攀岩石走，有個被譽為「連環孔」嘅天然奇景，樹窿、山窿大家就見得多，但同一塊石上有4個窿，你又見過未？
記者：陳震霖 攝影：陳智良
模特兒：Doris（SunSpot）、Yoee
水口鄉公所落車，前行5分鐘有路口直入鳳凰徑（第9段），呢段山路非常易走，路平少斜，中途又有涼亭畀你小休，大家記住慢慢行，呼吸多啖新鮮空氣，留番體力之後綑邊攀石。老實講沿途風光一般，過涼亭之後一段山路嘅松樹群算有啲睇頭，山坡培植咗差不多30棵松樹，棵棵茁壯成長，翠綠蒼勁。
離開松樹群，繼續前行15分鐘，有路標指示籮箕灣方向，下落石級路，5分鐘唔使就到籮箕灣。籮箕灣設有營地，有水源、公廁，假日好受露營發燒友歡迎，營地有條山溪，山水流入海灘，將兩邊嘅泥沙同碎石分開，驟眼睇幾似條「天然」小運河，喺度影番幅靚相都唔錯。
今日嚟唔係露營，影完靚相即刻起程，沿籮箕灣左面綑邊而行，腳程快身手好的話，大約2個小時就會搵到「連環孔」。2小時，聽落好似無乜難度，不過𠵱家唔係行2小時山路，係沿海皮綑邊2小時，話明綑邊，即係無「路」可行，只有大石可攀。所以出發前一定要帶手套、着爬山鞋，加埋支行山杖就更穩陣，否則輕則擦傷撞瘀，重則跌落大海，記住要量力而為，只不過遊山玩水，無謂攞條命較非，頂唔順唔該速速走頭。
綑邊道上搵個人都無，行到一半左右，終於見到班釣魚郎，原來籮箕灣係鮮為人知嘅釣魚勝地，資深釣友貪籮箕灣近海多亂石，適合玩磯釣，見佢哋拋絲落石底，唔使三五七分鐘，沙鑽、𩶘魚同黃腳𩶘排隊上釣，真係想問佢哋借支竿過過釣魚癮。
不停綑邊攀石，可能有啲悶，悶就唔該發揮吓想像力，沿岸有唔少臨海岩石，長年累月俾海水侵蝕，形狀變得好趣怪，有啲似腦袋，有啲似人猿頭，有啲似珊瑚，愈睇愈過癮。
行行重行行，眼望只得山與水，耳聽風聲浪聲喘氣聲，2小時過去，重唔見「連環孔」，正想放棄，攝影哥哥大叫一聲：「係咪嗰嚿石呀？」皇天不負有心人，終於搵到嘞！筋疲力盡嘅Yoee見石如見寶，成個人醒晒，急不及待衝前玩餐飽。
「連環孔」有4個窿，最頂嗰個窿最大，穿得入成個人頭，剩番嗰3個窿啱啱好放得入手手腳腳，只要身體柔軟度高，想點穿點捐都得，不過謹記要注意安全，一個唔覺意卡住咗就大件事喇，呢度位置咁偏僻，搵到人拯救都有排等。
玩完「連環孔」，沿路折返籮箕灣，Doris同Yoee話體力尚可，未夠喉想行多陣山，好！小記雖然既餓且疲，但靚女叫到一於捨命陪靚女，就由籮箕灣出發，經石欖洲、東灣直出石壁水塘，望地圖，全程6公里左右，平路居多，只有一小段需要上斜，同早前綑邊之「路」簡直天淵之別。
行到東灣，正值日落時分，水平線上圓圓嘅鹹蛋黃勁靚，本來喺沙灘摸蜆捉蟹嘅Doris同Yoee，俾眼前美景吸引住，睇到眼定定！開始入黑，收拾心情取道回程，路上，Yoee無端端問：「沙灘明明向西、明明睇到日落睇唔到日出，因乜解究叫東灣呢？」好問題，但沒答案，帶住呢個問號，拖住勁攰嘅身軀，2小時後行返石壁水塘，旅程正式完結。
交通
去程：東涌市中心乘11號（$11.8）或23號（$16）巴士，水口鄉公所下車。
回程：石壁水塘乘11號（$5.8）或23號（$5.8）回東涌市中心。
補給站
全程無食肆士多，綑邊攀石消耗極大體力，出發前一定要去水口鄉公所附近嘅士多買定糧水。
