農曆新年假期話咁快又過咗，又係結算利是錢的時候，辛辛苦苦𢭃咗咁多利是，不如買份禮物送畀自己。今次玩具開倉內有過百款玩具任你揀，連好多已經斷市嘅玩具都有得賣，而潮爆嘅B女同P女都有，Blythe重罕有地減到六百蚊唔使，無論你是玩具精、小朋友定潮女，相信會揀到心水玩具！
記者：黃秋燕 攝影：梁細權 Model：Michelle（DreamDestination） Hair：Stephine Makeup：Emily
造型多多的B女，係近年潮女至愛公仔之一，關於佢嘅網頁FansClub分分鐘多過好多偶像明星，今次加入開倉行列，屬必掃推介之選，雖然唔係平好多，但六百蚊唔使就可以擁有一個至潮Blythe公仔，想加入成為B女Fans一族，重等乜？
開倉價：$580
街價：$699（每日限售10個）
當B女愈來愈多Fans之際，有好多潮女已經轉玩Pullip，事關P女比B女個樣更加寸爆，雖然未必人人都鍾意，但就比較特別。這款着皮褸的P女，有型有款之餘，重有手袋同隻狗跟身，襯到絕！
開倉價：$399
街價：$550（每日限售10個）
唔係個個都鍾意B女同P女咁獨特的造型，相反好似Jenny咁典型的靚女公仔先係心頭好，手長腳長着咩衫都咁靚，今次開倉四折左右就可以買到一個，最啱送畀囡囡玩。
開倉價：$60
街價：$150
𠵱家好多人都會自己幫公仔做靚衫，親自為公仔設計造型，如果嫌麻煩，可以買現成的衫褲鞋襪，今次開倉有大量Jenny公仔衫同配飾任揀，可以一次過幫Jenny入定貨換季，順便換番個新造型！
開倉價：$20
街價：$40?60
近期高達迷認真忙，計早前聖誕有個高達展，今期開倉又有多款高達產品，尤以這個03年新款模型最高質素，屬於GUNDAM中最靚的模型，1:60的模型比例，手工、Detail位夠晒精細，未擁有的高達迷又點可以錯過？切記每日只售10個咋！
開倉價：$899
街價：$1,080（每日限售10個）
提起蒙面超人相信人人都知道，而龍騎是蒙面超人系列於2002年的作品，亦是最受歡迎的人物，這個京本龍騎大膠Figure，造型逼真又有型，大人細路都鍾意。
開倉價：$250
街價：$399
鍾意變形金剛的朋友，對於博派首領柯柏文一定有好深印象，𠵱家有好消息，因為已經斷晒市的合金柯柏文20周年紀念版竟然喺今次開倉有得賣，變形金剛迷咪錯過。
開倉價：$550
街價：$750（每日限售10個）
如果唔鍾意砌模型的朋友可以選擇這個1:100的高達合金Strike模型，模型任你隨意擺出不同的姿勢，重有埋其他配件Parts，唔使自己砌都有得玩，是高達迷另一必掃之選。
開倉價：$299
街價：$450
從未在香港出現過的啤酒機械人，非常盞鬼，以遙控操作，只要把一罐啤酒或汽水放在機械人上，㩒個遙控掣，機械人就會將啤酒倒入杯中，手的高度可自動調校，重可以控制倒啤酒的份量。
開倉價：$100
街價：$250
這款由TOMY出品的頭文字D限定版TOMICA套裝車仔，一套六架不同的車款，連主角拓哉部AE86都有，屬頭文字DFans必儲之物。
開倉價：$120
街價：$250
除大量玩具迷至愛的Figure玩具外，今次連小朋友玩具都有，其中這款海底奇兵迷你魚缸，𠵱家就可以帶佢返屋企，只要加1粒AA電，水中的魚仔就會游動，好似真嘅一樣，將佢帶返屋企，小朋友實鍾意。
開倉價：$89
街價：$109
哈姆太郎這套卡通片，差不多所有小朋友都鍾意睇，而哈姆嘅產品就更加多到數唔晒，其中這套廚房仔就啱晒女仔，一套有晒爐頭、用具同食物，可以約埋成班朋友仔玩煮飯仔啦！
開倉價：$80
街價：$150
明匯企業有限公司（25812282）
地址：葵涌和宜合道167至175號金威工業大廈二期22樓E座
日期：即日至2月1日 時間：上午11時至下午5時半
交通：可於葵芳地鐵站葵涌廣場門口乘專車直達。