梅艷芳生前與美容院簽下代言人合約，未履行完畢便已離世。日前有人公開一張錄音光碟，內容為美容院老闆娘曾裕（Joyce）追究阿梅生前經理人王敏慧（Marianne），不滿有人未能交代阿梅真正病情而簽兩年約，昨日Joyce接受訪問，否認由其發放光碟，並透露已支付七成酬金予阿梅。
梅艷芳生前與現代美容中心簽下兩年廣告代言人合約，合約只履行三個月，阿梅便病逝。日前香港各大傳媒收到一張收錄美容中心老闆娘曾裕與阿梅生前經理人王敏慧開會的聲音光碟，內容講述Joyce不滿阿梅於患上末期癌症的情況下仍簽下兩年合約，有意就此追討損失，而Marianne則表示對阿梅病情並不知情。
美容中心老闆娘Joyce一直未對事件回應，她昨晚於其辦公室接受訪問，甫坐下便拿着聲明發言，她說：「○三年八月，我哋同梅艷芳簽約前，喺君悅同梅小姐同Marianne見面商討合約最後細節，當時冇人提過梅小姐身體有任何問題。○三年八月二十二日第一次拍平面廣告時己經有好多謠傳，我問過Marianne究竟梅小姐身體狀況係點，Marianne都話係亂傳，話梅小姐只係貧血，到拍平面廣告見佢都戴住假髮，我提議不如用真髮可以變換多啲造型，但Marianne話頭髮太亂唔得。」
Joyce謂九月時，傳媒對阿梅患癌報道層出不窮，後來梅艷芳開記者會公開患癌病情，Joyce謂她再三追問Marianne，但對方仍謂梅艷芳只是貧血。Joyce續說：「佢開個記者會都係話患咗良性腫瘤（按：阿梅其時表示患上子宮頸癌，但聲稱是良性），未經醫生證實，都係貧血，重叫我要支持佢，唔好當佢係病人，即使叫晒人拉橫額支持佢，都係佢要求，唔係我自己揸主意嘅。喺記者會之前，我上咗去梅小姐屋企開會，Marianne都喺度，我見阿梅戴住帽，帽側邊啲頭髮好稀疏。當時冇人有任何意思、意識、動機提出終止合約，如果當時我知佢有病，一定勸佢唔好做，我唔係博宣傳。
「去京都返嚟啲報道話係催命之旅，我聽到好心痛，去之前佢話佢會好番，返嚟後有報道話佢差咗，我又再三問Marianne，佢話梅小姐喺屋企休息冇大礙。如果佢唔係話有足夠能力做工作，我唔會喺短短三個月投資咁大量金錢，我簽咗約後已支付咗七成酬金，未俾嘅係因為未履行合約。梅小姐喺十二月三十日去世，我完全唔知，當晚係有傳媒打畀我先知，我打畀Marianne，都係話冇事，佢咁講我就好放心，直至睇有線報道死訊。有報道話其實梅小
其後Joyce接訪記者發問，內容如下：
J： Joyce 記： 記者
J： 我聽到阿梅死咗，我個心都好唔舒服。喺梅姐去世前，有次我喺新加坡接到神秘人電話，知佢情況好危急，我一路有同Marianne聯絡，佢一路話佢冇事，話佢病情好穩定，我覺得Marianne應該為呢件事作出交代。我唔係針對人，我睇返近日嘅報道，Marianne話得梅姐同蘇小姐知佢嘅病，畀我呢個答覆好唔舒服，我諗醫生都會知啦。喺十六號佢上嚟我公司開會嗰日，我係想傾個解決方法，希望Marianne一次過交代，唔係計較退款，但有人一開始就唔係想咁傾囉。
記： 點解妳冇去到阿梅靈堂？
J： 我有送花牌同帛金，梅媽都要行二十分鐘先入到靈堂，我要行幾耐至入到去呢？宣傳活動我會去，但係嗰啲場合我怕傳媒，會問我催命之旅，我重送上一箱箱嘅紙巾去，要做嘅嘢我已經做晒，我喺新加坡都有設靈堂悼念佢，我做嘢都係出個心，點解王小姐一路唔肯講個遺產執行人係邊個？我只係想討回公道，天王巨星係唔會咁對支持佢嘅公司，早知佢咁嚴重，就唔會安排咁嘅工作佢做。有人嚟開會，叫我同佢律師傾，同得律師交往就係法律行動啦，連一句安慰同交代嘅說話都冇。
記： 妳講嘅有人，係咪指Marianne？
J： 唔可以直指，可能佢好忙，好傷心，傷心過度，佢又有明星風範，話等我一個鐘，係佢遲一個鐘，我一嚟就嗌佢靚女，但佢嘅態度同之前係判若兩人，可能佢唔開心，好煩燥。如果當日梅姐唔舒服，可以以身體不適嘅理由，書面建議終止合約，點解有人重安排咁多工作畀佢？
記： 有報道指阿梅曾喺許志安同梁漢文陪同下跟Joyce要求解約？
J： 幾時？邊有人上過嚟，簡直係天方夜譚，我都冇收過一個書面交代。整體唔係要針對人，係事件處理方法，坦白講，我見阿梅唔係好多次，知道佢係末期癌病都唔安排佢做嘢，都請名醫去醫佢。我同王小姐開會都係想有個安慰，從來冇話過要追索，希望大家可以坐低傾。好似《十面埋伏》都退番錢。阿梅一死，我哋即時抽起所有宣傳，係對死者尊重，對公眾交代。
我對佢個敷衍答案好出奇，佢一直陪伴出入醫院，好令人難以相信。
記： 你今晚跟記者見面的目的？你相信神秘光碟唔係出自自己員工？
J： 係要澄清一切，我相信自己嘅員工，況且事件發生我喺新加坡。就算交畀律師處理，我相信法律係公道。
對於Joyce所言，Marianne昨在電話中說：「我唔答，成件事公司（MuiMusic）已經交畀律師處理。」Joyce否認發放錄音光碟，Marianne表示：「唔係佢做就最好，大家一齊查下係邊個做啦。」
採訪：比華利
