禽流感唔傳人，但就傳到股市，亞洲區禽流感蔓延迅速，衝擊疫區股市全面下挫，香港股民試過去年沙士一疫，色為之變，加上近期港股位高勢危，終於借勢作出調整，恒指收市大跌330點，10日線（13463）亦跌穿，2月期指更低水51點。
跌勢初起，暫時不宜估底，但芬佬話唔會有大件事，調整一下，即使係深啲，即使5%至8%，唔會有大礙，後市嘅升勢會更為健康，家吓資金重源源不斷流入，伺機買平貨，佢哋有信心下個月仍係好市，恒指有機會再創今個升浪新高。
國企指數跌111點，跌幅2.3%，收4711，由1月5日的高位5441開始回落，已有3個星期，芬佬有信心能守得住1月19日低位4436之上，佢哋認為，今次調整，係低吸國企嘅大好機會，下一個升浪，國企可以作為主力出擊對象。
銀建國際（171）噚日一度搶上2.85元，創出6年半以來的新高，其後受大市跌勢拖累而回收2.675元，總算屹立不倒，成交5600多萬股，大增137%。以走勢而論，短期內好大機會破位而上，可伺機在2.5元至2.7元間吸納，跌破買入價10%止蝕，若突破2.8元阻力，初步上升目標指向3.5元。
銀建最近重組，信達入主成為大股東，持有22.94%權益。信達直屬中國建設銀行，係建行全資擁有的資產管理公司，負責替建行處理4700億元人民幣不良資產，入主銀建後，相信大動作會陸續有來，包括改名、逐步注入以10億元計的資產，以換取銀建的股份，最終成為持有控股權的大股東，而銀建亦會搖身一變成為市值百億元的大公司。
銀建本月中以2.0元作價披成2億股，消息話係由幾個大基金接去，只有極少數「應酬式」流出街，到目前為止，持逾5%的有摩根大通，合共持有1.17億股，佔發行股數8.54%。由於銀建改組後會變為金融控股公司，且會成為信達在港上市的旗艦，有消息指公司短期內會到新加坡和日本做「路演」，相信會吸引到更多基金注意。
郭兆誠