禽流感事件愈搞愈大，加上接連有公司批股，講親都以億元計，個市終於頂唔住大跌，小初真係怕港股跌勢已成，咁就有排靜，但亦有人話大市跌，係期指結算之故，小初真係唔識睇。
好多先前已錄得一定升幅的股票，噚日紛紛急回，但其中都有例外，好似賣健康用品的天年生物（1178），由去年底0.20元起步，噚日再創0.67元新高。
經紀陳話，天年去年年底搵到高手相助，所以股價有如神助，公司方面亦唔失禮，搵到曾經做過科龍（921）同埋Tom.com（8001）嘅掌櫃助陣，佢除咗獲送贈股票外，又獲得兩批認股權，行使價分別係0.31元同0.495元，以家陣天年市價計，帳面已經賺到笑。
小初唔明隻股炒到咁高為乜？好似噚日大跌市，天年最高見過0.67元，收0.64元，升4.9%，又係上市以來新高。
雖然經紀陳話隻股將有搞作，但喺呢個時間開車，難度會高好多。
慕容小初