海關關長湯顯明噚日出席鄉議局新春團拜，同八方講，時不時都會透過電郵同前上司葉劉聯絡，湯顯明話，葉劉好關心啲同事，重醒咗佢幾句，叫佢坐海關關長呢個位，最緊要就係要公平、公正。
湯顯明又話，葉劉都好關心香港嘅政治同政制問題，但係就冇畀任何意見。
另外，發叔今年年初二代表新界鄉議局為港人到車公廟求咗支中籤，副主席彭鏗然同八方講，佢較早前同中聯辦主任高祀仁傾開偈，高祀仁話求得中籤正切合香港嘅實際情況，重話有時唔一定要求到上籤先係好事。
不過意頭嘅嘢都係小心啲好，好似噚日曾蔭權向立法會解釋政改，要一步一步做，多次重複話唔想「雞同鴨講」。家陣禽流感肆虐，余若薇聽聽吓忍唔住起身話，啲雞雞鴨鴨呀咁，令人恐慌，呢排都係講少啲為妙。
傳真︰2623-9278
電郵︰