內地生產手機能力已經愈來愈純熟，部份生產商的功力更加能夠「超歐趕韓」，26萬色彩芒加靚靚和弦手機俯拾皆是，新到港嘅就有首信C8900同埋東方龍A328，兩者各具備6萬5色及26萬色彩芒，影相聲音統統都唔失禮。而且開價更要成$3,000，如今「內地手機=平價手機」相信已成往事矣！
記者：劉耀祥 攝影：黃子偉
ImageGirl：Kendy（CoolFactory）
論知名度，首信當然比東方龍更廣為港人熟悉，不過睇睇規格表，以東方龍規格稍勝一籌，30萬像素鏡頭、26和6萬色內、外彩芒及和弦功能，時下大熱功能都應有盡有。講多無謂行動最實際，即時睇睇呢兩部國產機有幾大威力！
東方龍A328外形都幾傳統（或者可以講做娘娘哋），銀色摺機放上飾櫃上可能未必吸引到你視線，不過拎上手就可能有另一番感受，手感好之餘，26萬色彩芒絕對可以叫你望多兩眼，畫面質素令人有理由懷疑手中所持的係咪內地生產手機。
內置30萬像素影相鏡頭的A328，想玩影相話咁易，唔講個26萬內彩芒，淨係用個6萬5色外芒已經可以大影特影，唔使打開機都可以影。若果用內芒影相就更加多嘢玩，10款相框及7款特別效果，總有一款啱你玩。而相片效果則做足本份，所欠只係解像度略嫌未夠，細緻度有待改善。
市面上好多手機都標榜原音鈴聲，之不過好多都係求求其其入一兩首歌就自吹自擂，最多就係畀條Cable你返屋企自己玩餐飽。若果打開A328個鈴聲菜單肯定會汗顏，皆因具有64和弦嘅A328內置15首樂曲（未計其他普通和弦鈴聲），15首全部都係流行曲，「我的驕傲」、「流星花園」主題曲等由新到舊都有，重係有人聲唱嗰隻，買返嚟就已經即刻有靚歌聽，唔使返到屋企同手機及電腦廝殺一輪先有得聽。而且音量絕對係響亮，唔望住重以為係收音機播緊歌，不過大聲亦都有問題，開到最大都會有啲拆，但係平時用都毋須要開到盡。
制式：GSM900/1800/1900三頻
顯示器：外：6萬5千色/STN/96×64解像度
內：26萬色/TFT/128×160解像度
鏡頭：30萬像素/10倍變焦
功能：64和弦、GPRS、MMS、30秒拍片
備用時間：115小時
通話時間：3.5?小時
體積：46×87×27mm
重量：88.5g
當東洋的影相手機依然保持其大隻身形之時，內地嘅影相手機相反就愈做愈細，水貨新到港就有Capitel首信嘅C8900，超細機身加埋30萬像素影相鏡頭，都只係同部細摺機咁上下身形。C8900雖然係內地行貨，不過一樣可以顯示繁體中文，對香港人就啱使得多。而功能介面亦設計得幾UserFriendly，拎上手玩一陣就知道「來龍去脈」。不過開價$3,480就稍為令人卻步，比功能更強嘅東方龍重要貴幾百蚊，加上始終有「牌頭」問題，對素有品牌主義嘅香港人，似乎都係要諗多陣！
睇多兩眼其實C8900有啲似曾相識，皆因同VKMobile部VK500源出一轍。所以C8900都一樣用上6萬5色彩芒，不過睇相一樣唔失禮，全賴有個30萬像素鏡頭，拍片影相都可以勝任。
畫面比想像中嘅6萬5千色彩芒清楚，而且反應敏捷，話影就影冇話拖泥帶水鬼影處處，而且16倍變焦夠你由全身Zoom到半身，最啱懶人一族或者唔方便周圍走嘅環境。不過講影相玩意就少咗啲，只有5款相框供選擇，好彩都有特別效果補番數，尤其搞鬼嘅負片效果的確幾搞笑。
制式：GSM90/1800雙頻
顯示器：外：OLED/96×64解像度
內：65,536色/TFT/
128×160解像度
鏡頭：30萬像素/16倍變焦
功能：40和弦、EMS、GPRS、拍片
備用時間：60?00小時
通話時間：120?80分鐘
體積：79.5×42.5×21.5mm
重量：75g
查詢：27717141（萬方科技）