個市怕咗禽流感，加上美股回落，恒指330點化為烏有，收報13431。禽流感擴散去到邊，或者會否成功控制，主宰大市短期去向。
唔使問，是日威水輪全部係Put輪。Put輪值唔值得博，除咗睇大勢之外，重要睇吓是否價外得太緊要，即係行使價是否仍然低過正股現價太多。長實Put輪9087行使價60元，9240行使價58.88元，9325行使價58元等，都低過正股73.25元好多，所以溢價都幾高。呢啲價外得太緊要嘅Put輪，賭三朝兩日博正股續跌帶來利潤尚無不可，但若然坐盤坐耐些少，又或者撞啱正股反彈，則會非常蝕底。想造淡揸Put輪搵食，應該揀啲咪太價外，溢價咪太離譜嘅Put輪，不過條件適合者唔多。
搵理想嘅Put輪，唔易。搵Call輪博正股反彈，亦要小心，有啲Call輪溢價重係太高，咪因為昨日輪價大跌而貪平上車。
電盈Call輪9290，散29%，收52仙，5月到期，溢價20%，槓桿率11.8倍。新地Call輪9532，跌26%，收56仙，7月到期，溢價13.4%，槓桿率13.5倍。呢類大跌但溢價仍高嘅Call輪，都係咪手痕。
章 盛