猴年一開畫，禽流感橫掃遠東、泰國、越南、台灣、寮國、印尼，連巴基斯坦，都齊齊表演一齣「殺雞儆猴」。未過年十五，已經大開血光之災，猴年運程係點，睇見東南亞各國一片雞毛鴨血，真係唔敢諗。
最邪就係泰國，禽流感還禽流感，唔知係咪因為同中國接壤，泰國政府竟然惹埋「張文康效應」，蓄意隱瞞疫情。反而特區嘅土共喉舌《文匯報》，竟然膽大包天，觸犯二十三條，搶先洩露一級國家機密，聲稱廣西發現禽流感。
嘩，咁都得？《南方都市報》老總就因為再爆沙士，遭到中方逮捕，話要查吓佢有冇貪污，文匯老總今次要因住吓嘞。
特區衞生福利及食物局長楊永強，率領代表團去曼谷開會。儍強臨行又話，禽流感喺特區爆發機會好微，又話政府已經做足清潔工作。儍強上次沙士夠話唔會喺社區爆發，根據童話故事《狼來了》嘅教訓，儍強若果個樣又好老定，咁就即是瘟疫即將降臨，市民反而有得防備，就好似肥平去車公廟求籤，對社會點都有貢獻。阿董死都唔炒儍強，原來亦係有玄學上嘅理由，即是好似喺澳門賭百家樂，有個賭客成晚都輸，咁成枱人反而識得點贏錢，就係凡佢買莊，大家就一窩蜂買晒閒，佢一買閒，個個就將叠籌碼隊番落去買莊，咁就會成晚只係輸死佢一個，成枱人個個都贏到笑嘞。
香港人過年等肥平求籤，一有禽流感就等靚仔強講嘢，喺𠵱家香港經已進入「車公治港」嘅新時代，好似廢董過年賀詞咁，香港反而搵到自己個新路向。所以你睇靚仔強淡淡定、有錢剩，個蛋撻頭好似舊年沙士前咁蠟靚，話香港大規模爆發禽流感機會微，為人父母嘅，就知道應該提早將啲仔女送去英國入寄宿學校嘞。
上次禽流感，有識之士一早就嗌咗實行中央屠宰制，唔知係咪董班子一聽到「中央」兩個字就腳軟，定係中央屠宰，中央一定要管到底，港方自把自為，唔符合《基本法》，係關乎一國穩定，所以又要邀請蕭蔚雲賀歲完畢之後再嚟多一次香港，向食環署及全港雞農鴨販，再次噴口水發出訓示，總之又係議而不決，決而不行。好嘞，卒之第二鑊禽流感殺到，變種快，洗牌勁，殺傷力更高，泰國嗰邊已經開始死人，邀請「護法」解畫，講解吓「中央屠宰」呢個名詞嘅「中央」兩個字嘅涵義，廢董都好應該快手少少，鑊鑊危機佢都龜縮，始終唔係辦法嘞。
至於儍強，雖然曼谷嗰邊啲桑拿浴好靚，泰式按摩嘅手指功亦好爽，開完會都係好快啲回港處理危機咯喎，今次冇咗個陳馮富珍，港人應唔應該食雞，少咗個父母官指示，唔通要望董夫人着起套荷李活兒童文藝片《ChickenRun》（港譯《咪走雞》）裏面全套母雞嘅羽毛戲服，表演親民騷，一路拍住對翼，一路「咯咯咯」咁叫，然後除咗個頭套，手指指咁講：「唔怕，我帶頭食雞、食雞、食雞」咩？
傳真︰2623-9278
電郵︰