港股噚日試底，結果就兜底回升，跌勢最急之時，恒指唔見成176點，國企指數亦大跌119點，但低位明顯有大盤硬接，中段之後，行情逐步由低位回升，午市買盤更聚，恒指終於高收13761，反升34點，而成交亦大增至245億元。
期指明日結算，噚日市況咁波動，相信係同期指轉倉有關。下個月，聽芬佬口風，仍會係好市，藍籌股、國企同二三線股百花齊放，升多個零月，大市先會出現真正的調整，唞番吓。
下個浪，恒指目標可見14500至15000點，金融股仍係升市主力，基金同大行呢輪買隻中銀（香港）（2388），買得好急，噚日成交就增加50%至3600多萬股，收14.8元，升0.1元。
基金看好中銀，主要係中國一路「挺港」所推出的措施，包括CEPA、人民幣結算、自由行，以及今年內會實施的QDII，對中銀的業務發展都好有利，加上4大國有商業銀行陸續安排上市，中線而言，對中銀股價有利好刺激。
個多月來，中銀披成過兩次，分別係大股東中行同渣打配售舊股，前者作價13.7元，後者14.75元，兩批貨絕大部份由基金接去，呢個位重大手入市，即使以較為保守的獲利目標3成計，佢哋心目中的中銀股價應在18元過外。
上月中，中銀股價曾升上15.9元，後因配售而回落到14元水平，之後形成三角形整固，降軌阻力14.9元，日內可望衝破，照度上去，第一個目標係16.5元。
講番二三線，好多都蠢蠢欲動，早輪推介過的冠軍科技（092），高收1.74元，升3.5%，即係已經賺咗隻窩輪，𠵱家頭肩底頸線阻力係1.76元，若衝破，呢鋪肯定財輪兼收。遠東發展（035）升到上2元水平，略為唞氣，破位而上，只係時日問題，初步仍可以2.4元為獲利目標。
另外，彩星集團（635）高收1.3元，升5仙，圖表已出現入貨訊號，短線阻力在1.4元，若升破，大升浪可確認，上升目標2元過外。
郭兆誠