個市唔怕亞洲禽流感，又再有勢，當然個別發展好明顯。地產股先排升到出煙，𠵱家唞吓，輪到電訊股抬頭，下一回合，估計輪到銀行股，係時候收定啲銀行Call輪。
中銀（2388）個勢好靚，早段大市軟軟哋之時，買盤完全冇退縮，收14.80元，有兩格進帳，成交由前市31球增至36球，再度熱身，搵Call輪埋手，揀9115同9218，兩隻輪炒法有啲唔同。
9115五月到期，輪價3.75元，竟然有負溢價1.1%，槓桿率唔算太低，有3.9倍。到期之前，正股會有息派，但即使係咁，咁早負溢價，都係非常抵買，因為平水或負溢價，若然睇好中銀稍長時間嘅走勢，隻輪揸耐啲都冇所謂。
9218九月到期，輪價22仙，溢價8.6%，槓桿率6.7倍。呢件壽命與槓桿率都着數啲，但要畀高啲溢價，溢價其實唔低，因為咁，用嚟炒啱過用嚟揸，撞啱正股升幾毫子，揸隻輪隨時有兩成利錢到手。
滙豐（005）低見122元，收123元，只係跌1格，估計守得住，吼位買Call輪9274，5月到期，溢價只係2.1%，槓桿率16.1倍，好爆炸啫。
章 盛