已經「淪」為大半個傳媒人嘅李鵬飛，噚日出席港台新春團拜，笑到見牙唔見眼。梗係啦，佢嘅愛駒「東海龍」喺猴年首個賽馬日就力壓群駒跑出，飛哥拉頭馬，重袋咗二十幾萬銀獎金，重話會分一半畀老婆㖭。
至於前黨友、財爺唐英年嘅愛駒就跑唔出。飛哥笑指，唐少已經夠晒好運，經濟個勢最近又唔錯，輸馬冇所謂啦！
講開春節，飛哥原來返咗順德玩兩日，又去陳村花卉市場閒逛，話好過癮。睇嚟最令佢念念不忘嘅係順德美食，咁有冇試食野味呢？飛哥即刻耍手擰頭，話順德除咗野味，重有好多美食。
農曆年假放完，係時候專注番香港時局，飛哥話田少應該出戰直選，因為贏輸好閒，但政黨唔參與直選就冇前途，否則下屆○八年，田少已經過咗「六張」，再唔可以俾人叫田「少」嘞。唓，怕乜吖，大陸嘅胡溫六張幾嘢先至接班，夠叫做「年富力強」嘅「青年一代」咯。
（圖〉飛哥話田少如果參加直選，自己要顧住做節目，唔得閒助選。
傳真︰2623-9278
電郵︰