經紀陳提過光宇國際（1043）可博反彈，噚日確係見到大量友好經紀力頂，但唔算好夠力，光宇一度低見2.65元，最後收2.80元，冇起跌。雖然小初即日未能獲利，但見到有關人等甚有誠意，所以打算再坐一會。
經紀黃過年前，曾叫小初買大成生化（809），前日已經蠢蠢欲動，噚日終於發難，最高見過5.80元，收5.50元，勁升16.4%，成交金額高達9067萬元。
經紀黃話，一早都話過某歐資大行會為大成搞推介會，噚日正係佢哋見芬佬嘅日子，該歐資行更出報告大力推介，將大成目標價調高至6.80元，所以升勢一發不可收拾。
經紀黃又推介另一隻股份，就係創維數碼（751），隻股舊年同樣獲得歐資行同金手指支持，股價升咗唔少，今次創維又被美資行睇中，雖然冇乜新意，都係話創維電視機銷量在大陸好掂。不過只要有人睇中，芬佬又受落，隨時再升過都唔奇。
慕容小初