本港樂壇有女子組合Twins，而喺蘇超聯就有MenTwins。法蘭迪保亞喺禮拜一免費加盟格拉斯哥流浪，除咗同佢阿哥朗奴重逢，重組成流浪Twins。
法蘭喺去年同加拉塔沙雷簽咗兩年，但佢喺呢間土國大會攞唔到正選，驚影響佢出席歐洲國家盃決賽周嘅機會，於是喺雙方同意下解約，重喺大佬搭路下過檔流浪並簽到季尾。
雖然法蘭有信心喺蘇超重振雄風，但我求大俠就有保留。朗奴之前話過蘇格蘭啲場因天氣太凍，令佢易傷之餘，重要遲遲都唔好；話晒佢細佬都一樣就快三十四，所以我求大俠真係好擔心佢頂唔住。
另外，流浪話過或喺季尾畀朗奴走，加上喺國內外都冇乜好爭，𠵱家重簽法蘭返嚟，唔通諗住整啲噱頭嘢而唔使畀些路迪威晒？
唔少球迷對意大利鋼門保方喺聯賽，俾安玻里前鋒洛基連入三球都好出奇，原來呢位門神為情煩惱，同田徑選手女友卡莉因為聚少離多，最終分手，搞到喺場上神情落寞，慌失失。不過，我求大俠覺得最值得一讚係佢班隊友，失咁多波都無怪責佢，都算唔話得囉！
愛華頓喺過去六場比賽因班球員喺熱身時將五十個波踢上觀眾席，搞到唔見咗三千五百鎊（約五萬港紙）。佢哋話明白球迷唔係貪心，只因啲波畀朗尼等球星踢過，想留嚟紀念；但就話佢哋經濟唔係咁好，想球迷交還啲波。愛華頓明知唔掂就叫球員咪踢上看台，𠵱家咁樣，幾小家！
「J博士」艾榮最近同結咗婚三十一年嘅老婆鬧離婚，所謂愛嘅反面就係恨，佢老婆最近竟然將一盒十五年前錄嘅三級帶，寄咗去《紐約郵報》。呢盒帶偷錄咗艾榮當年同一名女子喺酒店內偷歡，搞到J博士乜面都冇晒。話晒都老夫老妻，J博士個太座今次乎似做得太過絕喇！
姚明今年肯定有份打明星賽，但喺NBA今年一反常規，唔理「明王朝」打唔打到禮拜日明星賽，都一定要佢代表二年生打新人挑戰賽，等佢可以同今年嘅狀元爺勒邦占士正面鍊過。唔怪得今年嘅新人挑戰賽由慣常星期六舉行，專登提前至星期五舉行喇！原來NBA早有預謀。