豪宅市旺，買家熱情程度直迫九七。
中原壽臣山分區經理吳文忠話，從近期兩個現象，可以反映買家入市心切，以往無人吼嘅連租約樓，𠵱家照樣賣得，租期長一長，都搶購一空；另外，買家但求鬥快，連樓都唔睇就買，同之前至少睇十幾轉先至扑槌唔同晒。
中記近排就做咗幾單唔使睇樓嘅連租約買賣，其中一單係樓價接近三千萬嘅大潭紅山半島洋房，銀碼咁大，買家一樣無睇樓，買咗先算。
跑馬地禮頓山近幾宗成交，同埋同區樂陶苑一個原由顏福偉持有收緊租嘅單位，較早時以近六百五萬易主，買家全部都係未睇過樓就買。
咁重未算誇張，聽講有客放低定金畀代理，一有禮頓山放盤，只要係中層以上連車位，每呎一萬蚊樓下，就掃。𠵱家代理唔使周街搵客，唔使帶客睇樓，一搵到業主肯放盤，就可以做得成生意。
噚日年初六，係開市好日子，港島區整日洋溢新年氣氛，舞龍醒獅、點睛、採青表演，一浪接一浪，朝早先由金鐘太古廣場開始，正午抵達銅鑼灣時代廣場，下午三點半轉入銅鑼灣利園。
三支醒獅隊伍，合共十多頭獅子，精湛演出，吸引唔少市民圍觀。
最大陣仗係時代廣場，為慶祝開業十周年，出動九獅一龍，又請來郭富城做特別嘉賓。
中國人向來神心，喜歡拜神祈福，東莞樟木頭御景花園發展商就投住戶所好，初三嘅新春活動，都同呢方面有關。
當日燃點嘅三支巨型「萬福長壽香」，諗住申請入全球最高嘅健力士世界紀錄，夠晒創意。
呢三支香點解可以申請入健力士紀錄？
據講，支香高八米八，即係超過二十九呎，有幾個人咁高，要用一百五十日至可以造起，估計可以燒到七八十粒鐘，三日三夜都唔會熄，寓意生生不息。發展商早喺半年前就搵師傅製作呢三支巨香。
呢個活動，目的係為屋苑業主轉運求福，同埋祈求猴年福澤萬家咁話。
當日有成二千個業主出席。除咗點香，發展商又請嚟香港歌手彭健新獻唱。
將軍澳地膽代理行世紀21物業（將軍澳），寶盈花園地下第五間分行噚日開張。
舖位喺內街，前往祝賀嘅嘉賓，未必咁清楚位置喺邊，所以該行就派夥計喺地鐵站，同屋苑外圍，手持指示牌，若有到賀嘉賓詢問，就由職員帶佢到分店，認真夠細心。
蘭西都見到有啲嘉賓係由分行夥計帶領到達，原來呢招真係有用。
世紀21物業董事總經理鄺志輝話，公司主力做區內二手市場。
佢又透露，有啲同事重索性由外區搬入嚟住，𠵱家有八成同事住喺將軍澳。咁向啲客推介嘅時候，說服力都強啲啦！
蘭西
電郵地址：
