做運動除咗對身體好外，原來重可以搵錢。呢排忙緊籌款嘅港大校長徐立之，放假鍾意行吓山，早前佢行山就遇到個「富婆婆」，大家熟絡後，富婆婆知徐校長幫緊學校籌款，竟然大手筆捐咗百幾萬畀港大！
徐立之噚日首次喺校長府邸舉行傳媒春茗，佢同一眾傳媒一講起呢件事都眉開眼笑，重話捐款嘅唔只「富婆婆」，重有其他行山人士將寫支票畀佢，港大舊年至今已籌到二億幾蚊。
八方喺徐校長嘅府邸周圍參觀，點知見到地下嘅書房擺咗張桌球枱，乜徐校長鍾意篤波？原來係兩位徐公子嘅兒時玩意，專程由加拿大嘅大屋搬嚟香港，𠵱家兩個仔喺外國讀大學，徐校長間中都會自己喺屋企篤波娛樂吓。
不過講到間屋最架勢嘅，都莫過於嗰支重二十三噸嘅大炮，據講喺一八九○至一九一一年期間原本放喺域多利兵房作為香港西防衞之用。港大校長府四九年興建時發現支大炮，於是就擺咗喺度喇。
傳真︰2623-9278
電郵︰
