恒指紅盤高開低收，但全日波幅不足百點，意義不大。國企指數散逾3%，3隻重磅股中石油（857）、中鋁（2600）同中石化（386）被人力質，睇嚟有人想壓低國指結算。
重磅藍籌當中，滙豐（005）同中移動（941）表現失色，呢兩大天皇若然唔跌，恒指已可紅盤高收。滙豐同中移動受壓，可能因為期指周四結算，淡友力圖反撲，不過好友頂住其他藍籌，形成昨日拉鋸局面。
照咁睇，未來幾日恒指唔易有突破，可能會在13500至14000之間上落。策略依然係吼低買恒指Call輪較為着數，對象有9209同9282，都係5月尾到期，前者溢價2.4%，槓桿率10.8倍，後者溢價2.6%，槓桿率12.6倍。
昨日最出色嘅大藍籌，恒生（011）係其中之一，大升3元，收107元。相關Call輪自然威風八面，10大升輪佢哋佔咗4件。最威嗰件係9162，玩到4月16日，現價79仙，溢價只係0.8%，槓桿率13.5倍，屬於抵玩嗰類。更加抵玩嘅係9911，現價1.79元，4月6日夠鐘，負溢價2.1%，槓桿率近6倍。恒生Call輪普遍溢價唔高，可能係預咗正股將派高息。
章 盛