原本任職秘書的劉金蘭，兩年多前轉職到天使，由穩定的文職轉做sales，原因是自小對化妝扮靚有濃厚興趣，加上畢業後便投身秘書行業，工作刻板，而且「做秘書，無乜升職機會，最多加薪，除非老細升職，你跟住佢升。」所以她決定轉工。
她說，轉職前已獲得家人支持，也做好心理準備，無論收入及上班時間都有分別。「兩份工作喺收入方面其實相差不遠。」她說，雖然已有心理準備，但初期仍然不習慣，「談吐方面，單對單都無問題，但要顧及咁多客人，初時真係應付唔到。」
雖然只入職兩年多，但劉金蘭已由「禮貌大使」晉升為高級美容顧問。她說，初入行時由於觸摸不到顧客心態，經常發生尷尬事。「好似個客入嚟，我睇佢個樣係想買某樣嘢，所以就行埋去問，小姐想搵啲乜，洗面乳、爽膚水、香水……但個客好似好唔好意思咁，到最後至知原來佢想買包衞生巾。」
經過兩年留心觀察，劉金蘭已學懂睇客人「眉頭眼額」，她說：「有啲客着到身光頸靚，可能只係想買幾十蚊嘅貨，咁就唔再猛介紹貴價貨。」總括而言，她的成功秘訣是「將心比己」。