甫踏進這二樓咖啡店，就被牆上數排熊仔裝飾吸引着，坐下來，咖啡香撲鼻，再看四壁鮮橙，梳化雪白，天花掛上豔紅的縐布，心想：「老闆娘應該二十出頭吧！」結果我只猜中歲數，老闆阿Dee是個金毛青年，八年前愛上咖啡，半年前構思開店，積極行動，跟位後生拍檔一起實現夢想，每日忙足14小時，仍開朗投入，因為店裏的裝修及經營策略合晒佢心水，拼搏起來自然更起勁啦！
記者：楊一凡
攝影：梁細權
男仔之家，何以愛熊公仔？阿Dee說：「我一家四口都鍾意熊仔，我媽咪鍾意，自己買好多，咁爹哋愛媽咪，又買好多畀佢，我一出世已成屋熊仔，媽咪又遺傳咗愛熊基因畀細妹，我個妹又係熊仔癡。」因為由小對到大，已成習慣，開店時阿Dee索性把家裏的珍藏搬來，當中不乏絕版，而且有平有貴，至貴是Burberry，阿Dee笑說：「全屋人都支持我舖頭，但就反對我搬咁多熊仔走！哈哈。」
八年前阿Dee在中環大牌檔嗒過一杯香濃咖啡，那是用舊式的方法泡咖啡，把咖啡粉、椰絲、冧酒和雞蛋殼放進深鍋裏，加熱水焗出味，一焗就是幾十杯，雖這類大牌檔現已式微，但阿Dee自此每朝必定炮製六至七杯咖啡招呼自己，水溫80℃沖泡，加忌廉奶和黃糖。若全家歎早茶，他就外賣凍咖啡，配點心。
平日收工後只蒲咖啡店，跟咖啡癡搭訕，Cafe老闆就更加不能放過，到底傾咩呢？「講吓幾十個生產咖啡豆的地方，傾品種和如何沖泡，咖啡副產品如雪糕、蛋糕和糖，用優質咖啡粉做的雪糕，味道零舍香，我以前不吃糖果，但咖啡糖是例外，我出街總會幾粒隨身，鍾意就拆粒嗒吓，幾滋味。」
每朝一早阿Dee會親自到街市取貨，阿Dee說：「其中一位Partner做肉食批發，所以我們可用較平的價錢買到靚貨，這裏座位不多，雞扒日賣幾十客左右，用新鮮貨較化算。」
鮮雞扒用香草醃好後，烤至皮脆，吃時蘸甜甜的日式燒汁；另一脆皮拍檔是台式辣肉腸，那是阿Dee和朋友過台灣玩幾日時發現的美味小食，腸餡全是豬肉，沒有加麵粉，辣辣哋幾惹味；伴菜是意式炒薯片，把厚切薯片先烚過，然後加橄欖油和洋葱一齊炒，口感較薯條香脆。
眼見海鮮湯這麼稠，都知加了軟芝士和鮮忌廉，呷一口亦嗒得出是雞湯底，海鮮包括魷魚、蝦和白身魚，隨湯附上香草蒜茸包。湯很Creamy，不用叫主菜也夠飽肚。
把烚至煙韌的長通粉，跟菜粒同炒，最後鋪上煙三文魚及芝士，焗至芝士溶入通粉中，芝士份量十足，正好中和了煙三文魚的鹹味。
拿破崙是指香草肉醬番茄汁，那濃濃的香草味，連隔籬枱都聞到，豬頸肉是阿Dee的心水菜，故此每晚都是自己用香茅和香草去醃，翌日全塊生焗，收到柯打後細心薄切，阿Dee極認真的說：「切太厚味濃，太薄又怕香草味不夠，半厘米左右就差唔多。」
又是芝士菜，我發現阿Dee十分鍾愛濃味菜式，阿Dee說：「這款煙火雞卷是經營肉食的Partner介紹，不是太多本地食肆有供應。肉卷偏鹹而且是凍食，最好襯個芝士汁炒意粉，又濃又Warm。」
阿Dee沖咖啡只用澳洲的牛奶和鮮忌廉，他認為澳洲牛奶特別香，奶味重得來又不會羶，口感夠滑，熱Latte最能嗒到箇中滋味，而榛子跟咖啡味很夾，故榛子Cappuccino也是老闆推介。
（左至右）
Dickson：最鍾意飲阿Dee炮製的咖啡，好香濃，牛奶又夠滑，加上價錢合理。
Fanny：呢度好free好似朋友屋企，餐牌無公仔麫，但我話想食，佢哋都肯煮。
Stephanie：環境夠靚，座位闊落又舒服，坐幾耐阿Dee都唔會黑面趕你走。
店名：MilanoCaffe
電話：23663917
地址：尖沙嘴樂道1號永樂大廈二樓D室
座位：25個
營業時間：11:30am-11:30pm
