猴年紅盤高開但走低，亦以跌市收場，假前連升3日，恒指進帳近600點，調整一下重健康。恒指收13727，跌23點，成交196億元，期指則低水15點。
國企掉頭再落，內地地產股則大發神威，形成強烈對比。國企反彈完，再試底，多隻重磅股沽壓都幾重，尤以中石化（386）更大跌7.2%。呢一排，多間大行對國企後市嘅睇法都轉趨審慎，主要係早輪升幅太大同升勢太急所致，但調整完之後，又會有唔同睇法。國企今次再落，照計在上次低位應該守得住，可伺機低吸，未來兩三個月，國企仍會有一個大升浪。
上海復地（2337）招股，刺激內地地產股全面上升，北辰（588）同華潤北置（1109）都有近6%進帳；中國海外（688）中段好勁，尾市雖回番好多，但仍升4.1%。復地上市PE低，計最高定價亦只係11倍，相比其他的15至20倍，頗為吸引，相信又會掀起認購熱潮，想發新年財，遞表可也。
不過，講到偏低又有概念者，則非百仕達（1168）莫屬。百仕達主力經營三瓣業務，就係內地地產、燃氣同電力；地產股呢輪當旺，燃氣同電力，前景亦好樂觀。噚日收到料，話大陸資金已密密收集咗一段長時間，街外貨源已好乾，一㩒掣就會急升。
睇番周線圖，成年半時間，百仕達走勢形成一個大圓底，呢個係典型嘅收集形態，1.18元係頂部阻力，一突破，以量度升幅計，中線最少見1.9元，預期升幅逾60%。
百仕達發展深圳地產，可供出售樓面面積達80萬平方米，全部售罄可套現60億元。03年度（12月年結），公司售樓收益只不過幾億元，亦即未來3年，售樓利潤唔單止有保證，而且會大升。
旗下的百江燃氣（8132），以持有64.4%權益計，總值24億元，攤算每股百仕達已值1.3元；另外，尚持有威華達（622）33.7%，在完成供股後，近期股價更上升逾倍。
去年底，百仕達行使百江的可換股票據（每股成本0.59元），增購1.69億股，產生4億多元特殊盈利，有機會在03年度入帳，連同其他收益，每股獲利28仙，PE僅4.1倍。
郭兆誠