香港人又試好畀心機去買樓，簡直心無旁貸。
中原高級分行經理潘綺萍話，有個客原定初一返英國，與屋企人共度春節，眼見天氣愈凍、樓市就愈熾熱，於是毅然決定留港買樓。
呢個投資者一早睇中東涌藍天海岸，但係發展商年初四至開爐，佢就孤伶伶咁一個人等開門。重怕其他人捷足先登，當日比發展商開門時間提早半粒鐘，喺九點半到達售樓處等候。
結果唔只買到心目中嘅五座高層千二呎C單位，重打動發展商，將隔籬原本吊起唔賣嘅D單位都賣埋畀佢。
兩個單位總共盛惠五百二十七萬，連埋歲晚執咗個東涌東堤灣畔一座F室，一個禮拜內就用咗近八百萬，掃齊貨，先至返英倫。
家吓啲人買樓同買棵菜差唔多。究竟樓市係咪過熱，真係唔識答。
買家喺農曆新年都爭住入市，代理梗係好開心啦，究竟呢幾日成績係點？
美聯話，凡喺年三十至初四開單嘅前線代理，公司都會送五百蚊開單利是畀佢，總共派咗三百封。咁即係話，平均每日做到六十宗成交。聽講比舊年多幾倍，可見樓市幾咁暢旺。
公司有錢賺，老闆就算派多啲都會唔介意嘅。
另外，噚日美聯全線啟市，開工利是每封二十蚊。美記總共有三千五百名員工，都要成七萬蚊㗎。
唔少玄學家都盛讚薄扶林貝沙灣風水好，無論信唔信都好，呢個盤確實令好多業主賺大錢。
過去幾個月，喺五十幾單二手成交中，賣家無一不賺，由最早期去年十月轉手賺五十幾萬，到近期賣嗰批，至少賺過百萬，未入住已經賺到笑。
唔怪得玄學家麥玲玲推介貝沙灣好風水之餘，都心思思想買番件。發展商當然第一時間捉住呢位咁有潛力嘅準買家，推介即將開賣嘅第三期。
風水師呃你十年八年，呢句話係咪要改寫呢？
今個月樓市有幾好，淨係聽吓啲代理行宣布派花紅就知啦！
利嘉閣董事總經理何紹章（圖四）對蘭西講，今個月到二十五號，單係住宅部，已經有近三千九百萬數，同舊年九月嘅四千萬紀錄差少少，所以好有信心全月業績可以創新高。
佢又承諾，第一季會發放最少三分一個月糧，畀後勤員工做特別花紅，重話二三月，條數好啲就會再派多啲。真係恨死隔籬。
何紹章話，今年公司嘅目標係賺五千萬。咁所有同事都可以分多啲花紅，認真前景一片美好。
噚日蘭西講開，商場大業主新春舞獅表演，估唔到今日就有四個咁多，都算近年少見，除咗九倉同希慎，重有新世界同太古。
幾大商場業主都揀埋同一日，蘭西打探之下，先知原來今日係好日，宜開市同交易。
對於商戶生意人，梗係寧可信其有，況且有舞獅表演，起碼可以吸引到人流，做成生意機會都大啲啦！
蘭西
電郵地址：
