聽日初七人日，預祝全人類生日快樂，一於旅行應應節，去馬鞍山大水坑參觀「百子千孫樹」，呢棵樟樹生育能力超強，同根生出最少10枝粗壯樹幹，兒孫滿堂，當地村民話佢係靈驗風水樹，保佑闔家安康。
記者：陳震霖
攝影：陳盛臣
模特兒：Chole（SunSpot）
通往「百子千孫樹」前會經過一個土地公神位，左右對聯寫住「伯德無私扶過客，公恩有在佑行人」，Chole問：「又扶過客又佑行人咁，睇落拜一拜無衰喎！」唔肯上鏡嘅村民甲搭訕：「係咪搵風水樹呀？拜一拜土地公公先喇，保佑你出入平安㗎！」寧信其有不信其無，雙手合十三叩頭，求個心安理得都好。
土地公後面有2條石階路，揀左邊嗰條行，2分鐘唔使就見到「百子千孫樹」，呢棵樟樹超過30呎高，有超過10枝參天樹幹，邊一碌係主幹邊一碌係枝幹好難分得出，覆蓋範圍勁大，話佢係迷你森林都得，咁壯觀嘅畫面，重唔拿拿臨影番張靚相？畀埋貼士你嘞，正面睇棵樹，好似猩猩面，打側睇呢，又似幽冥鬼手，較啱角度先好影，無謂嘥菲林。
影完相唔好即閃，玩爬樹過癮吓都好，樹正中間有個大窿，自問夠膽識，可以一躍跳入樹窿，裏面好闊落，深到可以企一個人；如果360度睇清楚，會發現其他枝幹都有一兩個窿，不過面積與深度同正中間個窿完全無得比，不宜硬闖。
時間尚早，行埋梅子林至好走，富安花園過一道粉紅色天橋，沿梅子林路行45分鐘，再經黃色小徑行10分鐘山路到達梅子林村，上山之路唔算斜，沿途有成3個避雨亭，攰又可以坐低唞唞，呼吸一啖清新空氣，啱晒行山經驗尚淺嘅朋友。
時移世易，𠵱家嘅梅子林村已經十室七八空，只剩番兩、三戶老村民，丟空村屋無人打理，荒廢田園雜草叢生，愈行愈覺靜得嚇人，原本Chole打算闖入叢林到古屋一探，不過當佢發現附近滿布金塔，即時話：「都無謂打擾先人咯，速速走頭。」
旅程重未完結，再過泥涌玩餐飽，泥涌對開大片紅樹林，泥灘地質濕軟，係水蜆理想棲息地，每逢假日都有唔少人專登嚟摸蜆，雖然有人話近年烏溪沙同泥涌多大型建築工程，影響水質，但只要將水蜆浸3小時清水，再完全煮熟至開殼，泥涌水蜆一樣食得落肚。
摸完蜆，過西沙公路再睇七聖古廟，七聖？驟耳聽個名，可能唔知供奉甚麼神靈，但只要一提七姐，相信大家會有啲眉目，無錯！七姐即天庭七仙女，據說大家姐就係織女。二百幾年前，十四鄉鬧瘟疫，何仙姑指派七仙女下凡拯救，神靈現身殺退瘟疫，所以村民特登起呢間廟酬謝神恩。
望一望表，下午2點鐘，Chole呻肚餓，拿拿臨過西沙一帶茶座食餐勁，Chole揀彩軒園林茶館，點解？「露天雅座夠闊落，裝修布置重有我最Like嘅大黃菊㖭！」吹脹！家陣係醫肚唔係食花，即時Order番客海鮮炒飯同濕炒牛河，整多杯珍多冰送飯，嗚，好味到無得頂。
彩軒園林茶館（26429788）
地址：西貢北西沙路十四鄉泥涌10號E-F
