AC米蘭前日贈安科納五蛋，最令AC躉開心莫過於「邪星」雷哥斯達終射入加盟AC以嚟嘅首個意甲聯入球。AC躉等「達哥」入波可以話望穿秋水。話晒佢都算係球星級，希望猴年入開有條路啦。
「達哥」由費倫加盟後腳風認真唔順，射波唔係離行離列就係中柱中楣。我求大俠識唔少AC躉，曾幾何時每當「達哥」射波，班球迷實批死：「唔使諗，出界啦。」連「達哥」都作出零的突破，AC唔大勝至奇。
噚日提到佩魯賈嘅「雙英」箭頭，話口未完，安科納又出啱啱由英倫運到嘅加比搭查度嘅「雙英」組合。查度賽前預計呢場波好精采同多入球。結果係就係多入球，不過係人哋入晒啫，陰功……
車路士羅致目標嘅燕豪芬前鋒洛賓，佢老竇兼經理人漢斯話除非自己死咗，否則個仔唔會加盟車仔。漢斯勁插車仔老細阿巴莫域治唔識波，又話洛賓寧踢曼聯預備組都唔踢車仔。我求大俠就覺得凡事留一線好啲，富咸領隊高文夠話死都唔畀沙夏過曼聯，𠵱家沙夏咪做咗「紅魔」！
唔知大家重記唔記得費古羅亞？佢咪係伯明翰夏天時買番嚟嘅阿根廷年輕前鋒！不過佢加盟後冇乜表現，搞到伯明翰領隊布魯士拿拿臨將佢賣畀墨西哥嘅藍十字，而喺今屆南美洲奧運外圍賽，佢重表現不知幾好，有入波之餘重幫到阿根廷攞到首名出線奧運。唔通係布魯士走眼？
加斯居尼雖然俾人有啲「out」嘅感覺，不過，佢其實仍然好有娛樂性，好似星期日英國就有一場慈善足球賽，一班名宿對壘幫丙組隊達寧頓籌款，「肥仔嘜」出場時竟然喺球員通道中成個冬瓜咁跌低，好彩佢識得執生，即刻露出招牌笑容同球迷揮手，結果獲得全場掌聲。
周日足總盃曼聯作客諾咸頓，我求大俠見到「紅魔」新兵沙夏有份出現球場；雖然佢不符資格替曼聯上陣，但仍然跟埋大隊出征，可見佢真係好有決心想盡快融入球隊；再加上要爭位嘅科倫及基斯坦奴，喺呢場波表現可謂「破壞多於建設」，沙夏一定覺得不枉此行啦！