香港喺舊年發生沙士之時，大眾都注重公共衞生，勤洗手，唔亂拋垃圾。𠵱家冇事咯，啲壞習慣慢慢返晒嚟。姬絲住喺荃灣舊屋邨，近來好鬼𤷪，因為佢掛在廚房窗外曬嘅T恤，俾煙頭燒穿窿，夜晚瞓覺，睡房打開窗，竟然有垃圾飛入房。姬絲不勝其擾之餘，惟有閂窗，好彩呢排天氣寒冷，不致焗親。
香港有唔少呢類冥頑不靈，唔聽勸告，唔怕被拉，視公德如無物成日在樓上丟垃圾落地下之人，真係冇佢哋符。另一類冇佢收嘅，就係茶餐廳咖啡室夥計，經常在廁所內食煙，丟煙頭落地下及廁所。左丁山一位老友在中環街市附近一間大廈工作，大廈內起碼有三間咖啡室，佢每次入男廁都係見到煙頭，啲阿嬸已經好勤力清掃，仍然冇符！
講公德，講嚟講去，係教育問題；基礎教育已經有效㗎嘞，小學生多數有如廁洗手嘅習慣，最弊佢哋上到中學之後，如果群上壞同學，就染上壞習慣，小學學到嘅禮貌整潔，完全拋諸腦後，食埋煙，就更加唔掂。日本人本來已經好乾淨嘅，但在新宿街頭、涉谷行人天橋，左丁山見過唔少滿地煙頭，唔知點解食煙之人梗係鍾意亂丟煙頭嘅，左丁山認為佢哋有食煙嘅自由，唔贊成完全禁止吸煙，但點解佢哋係要在廁所食煙，丟煙頭落地及廁桶內呢？要問吓行為心理學家至得。