經紀陳新年頭威頭勢，首隻推介的中國燃氣（384）果然好掂，噚日復牌最高見過0.83元，收0.80元，大升11%，成交股數3466萬股，金額2760萬元，唔係乾炒。
經紀陳問小初怕唔怕冒險？如果唔怕，可以買入急跌的光宇國際（1043），據講有人對股價急跌感到唔開心，唔排除今日會反彈。
光宇噚日因一間日本手機製造商唔滿意其電池產品，終止合約，導致股價勁跌，最低見過2.725元，收2.80元，大跌13.85%，成交金額高達3340萬元。
經紀陳話，光宇除咗有兩個大芬照住之外，亦有高手坐鎮，故此向來走勢好有秩序。光宇喺舊年9月，以先舊後新方式，每股2.975元配售3400萬股，集資9900萬元之後，芬佬繼續加碼，理由係憧憬2003年全年業績表現會好靚。
點知今次光宇股價突然跌穿上次配股價，難怪有人唔高興。
慕容小初