近來筆者嘅網站多咗好多對波鞋店嘅投訴，內容多數都係話水貨舖態度差、二手貨當新貨賣、抽起鞋嘅附件（如佐敦復刻球鞋卡）；同埋唔連原裝鞋盒等等。呢啲投訴得一面之詞，好難判斷誰是誰非。為咗唔好一竹篙打一船「水貨舖」，等筆者喺度客觀少少評論一番。
其實買一件產品，主要會考慮產品質素、價錢和服務；買波鞋，無論係咪去水貨舖，產品質素都係一樣，要比較嘅就只有價錢同服務。
我相信𠵱家水貨同行貨競爭激烈，平十蚊八蚊，並唔係留客嘅最好方法，服務同店舖信譽至係最重要；因為留到舊客，新客自然會愈來愈多。不過，有小部份水貨舖嘅店員服務態度的確有問題，今時今日重抱着先敬羅衣後敬人呢個態度；其實，銀包有錢嘅人，未必可以喺衣着中睇得出；入得嚟就有機會做生意，點解態度唔可以好啲？
另外，水貨舖店內成日有一大堆朋友吹水煲煙就最致命，趕走好多一家大細同斯文客；加上互聯網發達，令一切變得透明晒，你做衰一次或對一個客唔好，好快就唱通街。可能店員覺得有啲客好煩，試嚟試去都話唔啱，重要猛講價；諗真吓，買嘢個個都係咁㗎喇。笑吓又唔使本，你都唔鍾意使錢重要受氣啦。信譽好服務好，啲貨貴少少人客都會願意幫襯！淨係搞靚裝修，扮日本舖，係得個殼冇用㗎！
有啲客亦要自我檢討：以為自己有錢就大晒，扮晒大爺咁使人：有啲人重有心留難店員，咁又何苦呢？你唔尊重人，又點可以要求人哋尊重你呢。購物係一種享受，買賣雙方各得其所，咁樣先至大家開心!
Hleung──波鞋網站