今日係大年初五，唔知大家有冇計過𢭃咗幾多利是呢？大使其實年初二已經要開工，不過做報紙呢行，人哋放假你要返工，已經習以為常，況且可以趁機向老細同埋同事𢭃利是補番數，冇咩所謂啦。當然，最幸福嘅都係讀書嘅朋友仔，大部份放到下個月2號先開學，大使就得個「恨」字。
講開一班莘莘學子，大家都知道早排蘋果基金啱啱完成咗2003-04年度助學金計劃嘅審批工作，353名入選嘅中、小學生名單亦已經公布咗，今次得獎人數破咗助學金計劃推行7年嚟嘅紀錄。
為咗隆重其事，蘋果基金會喺2月14日（星期六）下晝2點，喺蘋果日報辦公大樓搞個「助學金計劃頒授典禮」，到時除咗會邀請得獎學生同埋家長出席領取支票外，每位學生重可以額外獲贈精美紀念品1份。
禮品分別係由大眾書局捐出100張、每張30蚊嘅書劵，同埋中華書局捐出中華新字典共253本，大使喺度特別鳴謝上述2間商號。
另外，大使再提一提各位助學金申請人（即係學生嘅父母），到時如果你哋出席唔到，記得影印一張身份證副本畀仔女帶嚟核對姓名，如果冇帶嘅話，可能會白行一趟，第日要再安排補領支票就麻煩啦。
暖流熱線
電話:29908688
傳真:23702192
電郵:
網址：