香港人出名篤信風水命理，今年又係地運轉入下元八運嘅第一年，有關風水之說特別多。美聯物業請嚟風水大師余中哲，開辦「室內環境學」課程，用玄學角度向前線代理講吓樓盤同家居風水，果然跟得上市場脈搏。
呢個課程內容包括香港運勢、地運轉移、用九宮飛星理論點出猴年吉凶方位所在、點樣用五行學說嚟補不足同加強運勢等，重有埋例子㖭，咁就容易明白好多啦！不過，相信最煞食嘅應該係分析樓盤風水優點、用玄學角度揀樓嘅秘訣、同埋運用喺家居擺設方面。
為數六十人嘅前線員工自我增值後，同客溝通時就唔憂冇話題啦！做成生意機會重大啲㖭。唔知佢哋又會唔會近水樓台，順手同自己搵番間風水靚屋呢？
樓市交投暢旺，代理行收入豐厚，紛紛擴張迎接升浪，中原同美聯兩大集團已高調咁講咗擴充大計，將軍澳區地膽代理行世紀21安興，就會喺聽日年初六開設第五家分行（圖二），佢哋日前重改名為世紀21物業（將軍澳）㖭。原來世紀21物業（將軍澳）已經進駐將軍澳超過九年；初初加盟世紀21時，只有四間分行，咁睇佢哋都可以同大行有得揮。
土瓜灣傲雲峰發展商安排咗兩隻人咁高嘅馬騮，喺售樓處周圍同人拜年搞氣氛，得意可愛嘅造型加上動作生鬼，成為全場焦點，尤其大受小朋友歡迎，又握手又合照，玩得好開心。不過，部份年紀較細嘅小朋友，就俾兩隻大馬騮嚇親，攬住媽咪喊到收唔到聲，大膽啲嘅就主動走近馬騮身邊，充滿好奇咁拍吓馬騮隻大眼睛，既驚又喜嘅表情，比馬騮仔重可愛。
新春期間，商場大業主都會搞應節活動，攞番個好意頭，希望租客生意興隆，醒獅表演就最啱嘞。
新地主力催谷嘅中環國際金融中心商場，就揀今日年初五舉行醒獅，兩大業主新地同恒基租務部高層都會出席。
九龍倉年初六就喺銅鑼灣時代廣場安排「金猴醒獅賀新歲」表演，出動七隻南獅同兩隻北獅，認真大陣仗，重請嚟藝人郭富城做特別嘉賓㖭。
銅鑼灣大業主希慎興業都揀年初六，喺利園嘅私家車路上舉行點睛儀式，重安排一班小朋友表演醒獅，夠晒特別。
每年年頭同年尾，都係公司搞形形色色活動嘅日子，中原地產就喺農曆年前舉行周年晚宴，系內嘅利嘉閣，就揀二月三號喺九龍灣國際展貿中心搞周年晚會，由於係化妝舞會，聽講所有人都要化妝至可以入場咁話。舊年係中原入主利記後，第一年有錢賺，相信當晚大家嘅心情同氣氛，應該會好好多。
蘭西
電郵地址：
