佩魯賈今屆唔知搞乜鬼，喺意甲聯真係輸到人怕，佢哋雖然喺一月轉會市場重開後羅致由英格蘭回流嘅「白頭前鋒」拉雲拿利，同保夫萊特組成「雙英」前鋒組合；上周六聯賽對錫耶納另一「英超人」費奧，拉雲拿利重先開紀錄㖭；點知佩魯賈喺最後三分鐘連失兩球，始終無法打開今屆聯賽勝利之門，睇嚟踏入猴年依然無法轉運。
對於球隊今屆嘅表現，佩魯賈教練哥斯美喺賽後亦都𢱑晒頭，佢重話：「我覺得我哋佩魯賈今季簡直受咗詛咒！坦白講，我有不祥預感！」既然佩魯賈咁運滯，我求大俠就奉勸各位想追佢哋「反底」嘅球迷睇定啲，等到佢哋喺聯賽開咗齋之後再作打算都未遲。
肥仔門將冇得歎世界
非聯賽隊斯卡伯勒喺上周六英格蘭足總盃鬥「億萬大軍」車仔只輸○比一，都算係咁。不過，最唔抵嘅係佢嘅肥仔龍門獲加。事緣贊助斯卡伯勒嘅英國《太陽報》賽前話只要獲加喺比賽頭十五分鐘唔失波，就可以喺倫敦一間三星級酒店度周末，但佢偏偏喺十分鐘就失波，真唔抵！
球員淋過走晒樣
我求大俠前晚睇利物浦對紐卡素場波，紐記上半場的確打得唔錯，中場組織攻勢重好過主隊。不過，半場休息後準備開賽之際，突然之間落滂沱大雨；而成班紐記球員下半場就好似一個火爐俾冷水淋過咁，勁跌WATT，卒之俾紅軍壓住踢兼輸波，呢場雨似乎幫紅軍唔少喎。
上網訂購要認路
我求大俠講過，網上買歐洲國家盃決賽周波飛要小心，好多自稱有波飛賣嘅網站，似足早前啲假銀行網站咁呃人，俾人套咗信用卡資料就煩。歐洲國家盃組委會日前講明啲波飛喺官方網站
碰姚明難爭輝
中國籃球員王治郅喺前日熱火贏網隊場波威盡，創造咗五個個人職業生涯新高，點知喺噚日贏紐約人場波立即打回原形，後備上陣八分鐘一分都攞唔到，只得兩個籃板。咁蹺聽日熱火會對有姚明壓陣嘅火箭，兩人再有機會同場比試，但我求大俠懷疑「大郅」會唔會有機會上陣啫！