天寒地凍，加上港聯未能打入決賽，噚日賀歲波決賽日一如所料失收，結果只得一萬四千幾名熱情球迷入場，比初一少兩千幾；兩日賽事夾埋僅過三萬，創近十年新低，而門票收入當然亦都大減。足總主席康寶駒對入場人數當然唔多滿意，重諗住下屆搵啲外援幫港聯增強實力同號召力。
洪軍嘅「神奇教練」米路見球隊落後，下半場換入身高一米六五嘅矮仔前鋒紐拿斯，唔好睇紐尼斯人矮矮，但勝在靈活刁鑽，搞到挪威班高大守衞頭都大；每當紐拿斯同挪威嘅長人中堅一米九五嘅漢加蘭交手時，可謂相映成趣。
港聯響今屆賀歲波兩場都贏點數，卻輸波，球員自然冇贏波獎金可分，而有份踢足兩場嘅球員計埋入選費、出場費、練波費同埋足總高層及領隊利是等，大概只有六千六百，對球員嚟講算失收囉。