羊去猴來，謹祝各位炒輪順手，全年無憂。羊年最後1個交易日，港股半日大升180點，呢幾日農曆年假，美股企穩，睇嚟港股今日可以紅盤高開，能否高收則好難講。
藍籌股近排升得急，地產股尤其凌厲，話唔定再跑1程，就要回氣。反過嚟睇，國企股近日雖有反彈，但過去大半個月跌幅唔細，有機會再做好啲，接力炒上。內地年假特長，過往港股年假後復市，多有內地資金到港1炒，今年若不例外，紅色股份起碼炒幾日。
怕麻煩揀股，可以賭指數，買中企（國企）指數Call輪，對象係9317，現價65仙，玩到5月28日唔算短命，已有負溢價近1%，槓桿率細細哋都有4倍。
國企指數如果繼續反彈，龍頭股中石油（857）多數會郁，相關Call輪不妨短炒。上個禮拜推介嘅中石油Call輪9901由1.28元升上1.42元，溢價縮到0.6%，玩到8月尾，槓桿率2.9倍，仍可持有。
想刺激啲，可揀9405，玩到6月21日，槓桿率有6.7倍，溢價就要畀高啲，去到9.5%。呢件有個好處，就係成交旺而買賣差價緊貼，啱炒出炒入。
章盛