雖然呢排低溫天氣破晒近年嘅紀錄，但前日大年初三天氣好好，天朗氣清，立法會議員涂謹申同成班朋友嘅赤口節目就係行山，估唔到有位問責高官都有同一選擇。
前日八方同阿涂成班朋友由陽明山莊行去大潭，喺陽明山莊門口已經見到一架車牌AK1嘅車停喺度，大家一時諗唔起邊個名人有咁靚車牌，再行落去，迎面就見到教統局局長李國章一身輕便運動服，同太太好恩愛咁蹺住手行，大家先至醒起AK1正係綽號「亞瑟王」嘅李國章嘅車牌。
李國章雖然被指作風專制，但都幾鐵漢柔情。不止佢，最近政界好多人都Sell恩愛，阿涂兩星期前同老婆拍拖經過太古城溜冰場，又見到勞工處副處長丁福祥同太太拍住拖溜冰。丁福祥正係幾年前曾以「焗不熟的栗子蛋糕」形容草擬緊嘅廣播條例草案，惹來軒然大波，傳聞土共一度迫阿董郁佢，𠵱家佢兩公婆好似一對穿花蝴蝶咁輕鬆溜冰，一個下午都冇躀低，睇嚟都已經踩線成功嘞。
（圖〉李國章同太太蹺住手行山，真係恩愛。 資料圖片
傳真︰2623-9278
電郵︰