張智霖同楊怡噚日喺大角嘴街頭拍攝新劇《水滸無間道》，噚日朝氣溫十度都唔夠，身為男子漢嘅張智霖都頂唔順，要打晒底，佢忍唔住自嘲話：「我都覺得自己有少少似虧佬，我連下身都打埋底㗎。」
楊怡同張智霖喺劇中係由細識到大嘅朋友，楊怡後嚟做咗醫生，但張智霖就入咗黑社會喎，噚日場戲講楊怡勸佢退出黑社會，但其實張智霖真正嘅身份係卧底，佢哋兩個喺街頭互相拉扯時重整親楊怡㖭！
張智霖話噚日第一日開工就要開朝早七點，真係有啲唔慣，雖然佢新年期間冇去玩，但晚晚喺屋企睇波睇到好夜，但佢都有同女友袁詠儀去行花市，張智霖話：「我都未見過花巿有咁多人，所以經濟應該好好。我都諗住買樓投資，不過冇時間去睇樓。」問佢女友袁詠儀有冇畀意見，張智霖即刻話：「我同女朋友經濟獨立㗎！」
由黎明同王菲主演嘅電影《大城小事》下個月十二號上畫，電影公司喺金鐘地鐵站月台登咗旋轉廣告，成為第一個喺轉動廣告燈箱賣廣告嘅客戶。導演葉偉信同黎明日前重專登去咗地鐵站視察，佢哋覺得新年多人搭地鐵，可以收到最好嘅宣傳效果，馮仁昭都覺得幾新鮮嘅。
徐若瑄日前專登由日本返台灣過年，重買咗條紅色底褲着，佢話家姐就嚟生第二胎，所以自己都要着紅底沾吓喜氣攞個彩。徐若瑄同家姐只係差一歲，佢話今年嘅新年願望係快啲搵到一個真正愛自己嘅人，快啲出嫁，徐若瑄出到聲話恨嫁，睇嚟緋聞男友吳建豪應該要有啲表示先得。
嚴淑明喺台灣推出咗處女大碟，佢聲稱十日已經賣咗一萬張，喺同期出碟嗰二十六個新人嚟講，成績已算唔錯。嚴淑明話台灣人叫佢做新一代性感女神，所以每次出席活動，都要配合形象着少啲，但弊就弊在呢排天氣凍到冇人有，每次佢出席活動時都凍到震騰騰，馮仁昭都戥佢辛苦。
鄭伊健日前接受港台《舊日的足跡》訪問時，提到曾經面對事業低潮，伊健話：「我當時唔知點搵番自己個方向，我試過同經理人林珊珊鬧交，好彩之後都冇事。」
伊健上年已經約滿英皇，𠵱家重未簽新唱片公司，佢話今年會再出唱片，伊健歌迷不妨拭目以待。
劉錦玲噚日身穿一身紅色裝束喺大角嘴出席公開活動，佢話今年最希望行桃花運，所以會不時着顏色鮮豔嘅服裝示人。
劉錦玲笑住咁話：「我𠵱家乜嘢聚會都會去，識多啲新朋友，因為我都開始急急地待嫁。」咁就祝佢好運啦！
