猴年第一個交易日，小初向大家拜年，祝大家股市發大財。
過年時食到滯嘅經紀陳，推介猴年第一隻心水股，就係今日復牌的中國燃氣（384），原本持有接近17%股權股權的恒鋒集團（185），已經將所持的大部份股份沽畀中燃的董事，然後該名董事又同關連人士，一齊認購中燃新股，成為最大股東，擺明係一統天下嘅格局，所以隻股值得留意。
經紀陳又話，自從中燃在年前賣殼，變身燃氣股以來，市場傳聞一直有人想買恒鋒所揸住嗰手貨，但對方覺得係寶，遲遲唔肯放手。由於呢手貨可能為中燃帶來潛在沽壓，所以有人點都要諗辦法解決。
今次中燃嗰位董事，大拿拿拎成1.8億銀，以每股0.72元，向恒鋒購入2.5億股中國燃氣，跟住又同關連人士，以每股0.65元認購中燃新股，再使1.17億元，令持股量增至22.74%，成為最大股東。雖然今次咁做相當大手筆，但總算取回控制權，睇嚟日後開車冇咁多阻滯。
慕容小初