帝后榮譽花落誰家今揭曉
《魔戒3》七賠一熱爆金球獎

第六十一屆金球獎頒獎禮，香港時間今朝喺洛杉磯舉行。大會準備得如火如荼之際，噚日美國好多傳媒爭住做賽前預測，佢哋一致睇好《魔戒三部曲：王者再臨》可以成為大贏家，我羅拉亦拭目以待。

辛潘呼聲高
電影網頁Goldderby.com前日將《魔戒3》捧成七賠一嘅大熱門，睇好佢贏到「最佳劇情組電影」，而彼得積遜（PeterJackson）亦以六賠一嘅熱爆賠率，成為「最佳導演」嘅頂頭大熱。至於劇情組嘅影帝影后，仍然係《懸河殺機》嘅辛潘（SeanPenn）同埋《Monster》嘅查理絲泰朗（CharlizeTheron）嘅天下。
至於喜劇?歌舞片項目方面，《迷失東京》就係五賠七嘅大熱門，連男主角標梅利（BillMurray）亦俾人睇高一線，相信佢可以首奪金球影帝。
另外，有英國奧斯卡之稱嘅英國電影頒獎禮，前日亦喺洛杉磯舉行茶會，有份角逐金球影后嘅奧瑪花曼（UmaThurman）同埋施嘉莉祖安遜（ScarlettJohansson）都有出席，講到有冇信心攞金球獎，佢兩個都好謙咁話志在參與。

妮歌平常心
另外，有份憑《亂世情天》角逐金球影后嘅妮歌潔曼（NicoleKidman），雖然攞獎呼聲急降溫，不過日前佢接受萊利京（LarryKing）訪問時，佢就話會以平常心面對獎項，費事畀自己咁大壓力。