下個月舉行嘅立法會議員與記者同樂日，除咗有之前公布嘅才藝比拼、羽毛排球同猜謎語玩，重有個未公開嘅「神秘表演節目」──立法會女子十二樂坊，由全女班議員玩RPG（角色扮演遊戲），扮演近來人氣熱到爆燈嘅女子中樂組合。
其實講話「全女班」唔係咁正確，因為立法會數晒都係得十一位女性議員，其中吳靄儀又唔知為乜嘢原因冇參加，要扮女子十二樂坊，除咗搵到出名靚女嘅立法會助理秘書長吳文華助陣，重臨時拉伕，叫埋肥仔李華明反串。
八方聽到個陣容，已經差啲笑到反肚（見表）。為求逼真，立法會秘書處重專登錄低女子十二樂坊嘅表演片段，每位參與「演出」嘅議員都收到一盒錄影帶，以便好好揣摩吓人哋十二位靚女喺舞台上嘅神韻。
不過，正牌女子十二樂坊個個都係青春索女，上親台唔係低胸、露膊，就係貼身小背心，其他女議員八方唔敢講，單係李華明嘅「飛毛腿」同腰部嘅「士啤胎」，如果着上性感小背心，肯定勁過伊拉克嘅「大殺傷力武器」，但係兩年前肥仔明已經喺同樂日扮過「萊溫斯基」，呢勻第二次扮女人，應該駕輕就熟。
傳真︰2623-9278
電郵︰